Atyraýda birneshe turǵynnyń atyna 7 mln teńge nesıe rásimdegen kúdikti ustaldy

<p>ATYRAÝ. KAZINFORM &ndash; Atyraýda 36 jastaǵy kúdiktiniń turǵyndardyń atyna 7 mln teńge nesıe rásimdegeni anyqtalyp otyr. Kúdikti qamaýǵa alyndy.</p>

Atyraý oblystyq polıtsııa departamentiniń baspasóz qyzmetinen málim etkendeı, qazir kúdkti ustalǵan.

«Krımınaldyq polıtsııa basqarmasyna qarasty kıberqylmysqa qarsy kúres tobynyń qyzmetkerleri jedel izdestirý is-sharasyn júrgizip, birneshe turǵynnyń atynan bank qosymshasy arqyly 7 mln teńgege jýyq nesıe rásimdegen kúdiktini anyqtady. Zańsyz qarjyny ıemdengen 36 jastaǵy kúdikti ustaldy», -dep habarlady departamenttiń baspasóz qyzmeti.

Qazir kúdiktige qatysty alaıaqtyq deregimen qylmystyq is qozǵaldy. Kúdikti qamaýǵa alyndy. Ózge aqparat tergeý múddesine sáıkes jarııalaýǵa jatpaıdy.

Atyraý oblystyq polıtsııa departamenti kıber qylmysqa qarsy kúres tobynyń aǵa jedel ýákili Ashat Nurmanovtyń aıtýynsha, byltyr ınternettegi alaıaqttyqqa qatysty 747 qylmys tirkelgen. Jergilikti turǵyndar alaıaqtaarǵa 400 mln teńgege jýyq qarjysyn berip jibergen.

«Bıyl jyl basynan beri osyndaı 500-ge jýyq qylmys tirkelip otyr. Jábirlenýshilerdiń arasynda áleýmettik mártebesi ártúrli turǵyndar bar. Tipti 25 pen 45 jas aralyǵyndaǵy jastar zardap shegedi. Alaıaqtar kóbine tek orys tilinde sóılesedi. WhatsApp jelisi arqyly habarlasady. Psıhologııalyq qysym jasaıdy. Sóılesý kezinde oılanýǵa múmkindik bermeı, asyqtyrady. Keıde týysyńyzdyń atynan qaryzǵa aqsha suraıdy», -deıdi Ashat Nurmanov.

Eske sala ketelik, budan buryn Qulsary turǵyndary alaıaqtardyń kóbeıgenine alańdap otyrǵanyn jazǵan edik.