Atyraýda birneshe ret para alǵan ınspektsııa basshysy 7,5 jylǵa sottaldy
Qylmystyq is Atyraý qalalyq №2 sotynda qaraldy. Kúdiktilerge QR Qylmystyq kodeksiniń 366-babynyń 3-bóliginiń 2 jáne 4-tarmaǵymen, 28-babynyń 3-bóligi, 367-babynyń 2-bóligimen aıyp taǵylǵan.
Oblystyq veterınarııalyq baqylaý jáne qadaǵalaý ınspektsııasynyń basshysy laýazymdy tulǵa bolǵanyna qaramastan birneshe ret JK dırektorynan 1,4 mln teńge, ShQ basshysynan qamqorlyǵy úshin 500 myń teńge para alǵan. Sondaı-aq, ol BQO ınspektsııasynyń bas mamanymen jáne veterınarlyq ınspektormen aldyn ala sóz baılasyp, JK dırektorynan jalpy qamqorlyǵy úshin 1,8 mln teńge para alýdy uıymdastyrǵan.
BQO ınspektsııasynyń bas mamany men veterınarlyq ınspektor aldyn ala sóz baılasyp, qamqorlyq tanytqany úshin JK dırektorynan 1,8 mln teńgeni para retinde ıemdengen. JK dırektory men ShQ basshysy QR shekarasynda kóliktiń zańsyz qozǵalysy úshin para túrinde 3,3 mln teńge jáne 500 myń teńgeni ózderi bergen.
Sottalýshylardyń kinási sottalýshylardyń, kýálardyń aıǵaqtarymen, aqsha qarajatyn aýdarý týraly túbirtektermen, tergeý áreketteriniń beınejazbalarymen, mamandardyń qorytyndylarymen dáleldendi.
«Sottalýshylardyń asyraýynda kámeletke tolmaǵan balalardyń bar ekeni, kinálaryn moıyndaýy jaza men qylmystyq jaýaptylyqty jeńildetetin mán-jaı retinde tanyldy. Olar taǵylǵan aıyp boıynsha kináli dep tanyldy. Inspektsııa basshysy 7 jyl 6 aıǵa bas bostandyǵynan aıyryldy. Bas maman men veterınarlyq ınspektorǵa para somasynyń 60 eselengen mólsherinde aıyppul taǵaıyndaldy. JK jáne ShQ basshylaryna para somasynyń 26 eselengen mólsherinde aıyppul salyndy. Barlyǵy memlekettik qyzmette jáne memlekettik uıymdarda qyzmet atqarý quqyǵynan ómir boıyna aıyryldy», dep málim etti sottyń baspasóz qyzmetinen.
Sot úkimi zańdy kúshine engen joq.
Eske sala ketelik, buǵan deıin Atyraý oblysynyń 12 mektebinde 41 «óli janǵa» 90 mln teńge jalaqy tólengenin jazǵan edik.