Atyraýda birneshe adamdy aldaǵan kúdikti qamaýǵa alyndy

<p>ATYRAÝ. KAZINFORM &ndash; Atyraýda bir jyl boıy birneshe adamdy túrli tásilmen aldaǵan kúdikti ustaldy. Kúdikti qamaýǵa alynyp, alaıaqtyq deregimen qylmystyq is qozǵaldy.</p>

Atyraý oblystyq polıtsııa departamentiniń baspasóz qyzmetinen málim etkendeı, ustalǵan kúdiktiniń jasy – 30-da. 

«Kúdikke ilingen Atyraý qalasynyń turǵyny 2022-2023 jyldary tanysynyń senimine kirip, jumysqa turǵyzyp beremin dep aldaǵan. Sóıtip, jábirlenýshige 800 myń teńge materıaldyq shyǵyn keltirgen. Qylmystyq áreketin iske asyrý úshin áıel daýsymen sóılesip, birneshe sım-kartany paıdalanyp otyrǵan. Ol munymen shektelmeı, qala aýmaǵynda ornalasqan páterdi jalǵa alyp, ony satyp jiberý úshin aldyn ala tólemder alǵan. Mysaly, 150 myń teńgege jalǵa alǵan páterdi 8 mln teńgege satatyny jóninde habarlandyrý bergen. Páterdi satyp almaq bolǵan jábirlenýshiden avtokólik pen 2 mln teńgege saýdalasyp, qarajatty notarıaldy túrde qaryz alý shartyn jasaqtaý arqyly alatynyn aıtqan. Budan ózge turmystyq tehnıkalyq zattardy satamyn dep áleýmettik jelide jarnama jarııalap, birneshe turǵyndy aldaǵan», -dep habarlady departamenttiń baspasóz qyzmeti. 

Qazir alaıaqtyq deregimen qylmystyq is qozǵaldy. Kúdikti qamaýǵa alyndy.

Eske sala ketelik, buǵan deıin Atyraýda nasybaıdy zańsyz satqan sheteldik azamat ustalǵanyny habarlaǵan bolatynbyz.