Atyraýda bir otbasynyń eki balasy Jaıyqqa batyp ketti

<p>ATYRAÝ. KAZINFORM &ndash; Atyraý qalasynyń mańyndaǵy Qurmanǵazy aýylynyń tusynda bir otbasynyń eki balasy Jaıyq ózenine batyp ketti. Biriniń múrdesi tabyldy. Al, ekinshisin izdeý jalǵasyp jatyr.</p>

Atyraý oblystyq tótenshe jaǵdaılar departamenti qoǵammen baılanys tobynyń málimetinshe, eki jasóspirim búgin, 1 tamyzda tús mezgilinde ózenge batqan. 

«Bul týraly departamenttiń dıspetcherlik pýltine búgin saǵat 14:53-te habar tústi. Atyraý qalasyna taıaý ornalasqan Qurmanǵazy aýylynan tusynda eki jasóspirim Jaıyq ózenine sýǵa túsken. Ekeýi de – bir otbasynyń balasy. Onyń biri – 2017 jylǵy ul, ekinshisi – 2015 jyly týǵan qyz», - dep habarlady departamenttiń qoǵammen baılanys toby.

Qutqarýshylar oqıǵa jedel jetip, izdestirý jumysyna kiristi. Ózenge batqan jasóspirimderdi izdestirýge 6 qutqarýshy, 3 júzý quraly tartyldy. Departamenttiń psıhologteri eki balasy sýǵa batqan otbasyna psıhologııalyq kómek kórsetip jatyr. 

«Tús qaıta saǵat 16:20-da departamenttiń jedel-qutqarý jasaǵynyń súńgýirleri 7 jasar uldyń múrdesin taýyp, jaǵalaýǵa shyǵardy. Qazir 2015 jylǵy qyzdy izdestirý jalǵasyp jatyr. Qutqarýshylarǵa polıtsııa departamentiniń qyzmetkerleri men aýyl turǵyndary kómekke keldi», - dep málim etti departamenttiń qoǵammen baılanys tobynan. 

Eske sala ketelik, budan buryn Atyraý oblysynda jaz bastalǵaly sýǵa batqan 9 adamnyń tórteýi – bala ekenin habarlaǵan edik. 

Sondaı-aq, 20 shildede Atyraýda eki jasóspirim Jaıyq ózenine batyp ketti. 

Keıin eki kúnnen soń taǵy eki jasóspirim Jaıyqqa batqanyn jazǵan bolatynbyz.