Atyraýda bir kúnde jol jıegine 1 myń kóshet egildi

<p>Atyraýdaǵy Jańatalap aýylyna qatynaıtyn tas joldyń jıegine 1 myń kóshet egildi, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«Búkilqazaqstandyq aǵash otyrǵyzý kúni» respýblıkalyq aktsııasy aıasynda kóshet egý senbiligine 300-ge jýyq adam qatysty. Memlekettik mekemeler qyzmetkerleri, qoǵam belsendileri men turǵyndar úıeńki, qaraǵash, shaǵan kóshetterin ekti.

Oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Nurlan Jantoqovtyń málimetinshe, 2025 jylǵa deıin 540 myń kóshet egý josparlanǵan.

– Atyraý olysynda eldi mekenderdi kógaldandyrý men jasyl aımaq qurýdyń 2021-2025 jyldarǵa arnalǵan óńirlik jospary bar. Soǵan sáıkes 275 gektar aýmaqqa 540 myń kóshet egiledi. Bıyl josparǵa sáıkes 54,7 gektarǵa 111 myń 42 kóshet egý josparlandy. Kóktemgi naýqanda 18 gektarǵa 19 myń 500 kóshet egildi. Endi kúz aılarynda bul jumys jalǵasyp jatyr, -dedi Nurlan Jantoqov.

Onyń aıtýynsha, Atyraý oblysynda orman alqabynda kóshet egý men molaıtý baǵytynda keshendi jospary jasalǵan.

– Jospar boıynsha 5 jyl ishinde 2 803 gektar orman alqabyna 7 mıllıon kóshet egý kózdeldi. Soǵan sáıkes 2023 jyly 573,5 gektar jerge 1 mıllıon 439 myń kóshet egý josparlanǵan edi. Kóktemgi mezgilde 361,5 ga jerge 931 myń kóshet egildi. Bul jumys áli jalǵasady, -dedi Nurlan Jantoqov.

Eske sala ketelik, budan buryn atyraýlyqtar Oralǵa qatynaıtyn jol jıegine 500 kóshet ekkenin jazǵan edik.