Atyraýda byltyrdan beri qarjy pıramıdalarynyń 355 siltemesi buǵattalǵan

<p>ATYRAÝ. KAZINFORM &ndash; Atyraý oblysynda qarjy pıramıdalarynyń 355 ınternettegi siltemesi buǵattalǵan.&nbsp;</p>

Atyraý oblystyq ekonomıkalyq tergep-tekserý departamentiniń basqarma basshysy Bekbolat Ánesovtiń aıtýynsha, mamandar kúmándi siltemelerge taldaý jasaǵan.

«Keıingi jyldary qarjy pıramıdasynan zardap shekkenderdiń qatary kóbeıdi. Oǵan basty sebep – qarjylyq saýattyń tómendigi. Taldaý nátıjesinde byltyrdan beri 355 saıttyń siltemesi buǵattaldy. Onyń ishinde byltyr 296 saıt siltemesi anyqtaldy. Al, alaıaqtardyń 59 siltemesine buǵattaý qoıyldy. Degenmen, byltyrǵy derekpen salystyrǵanda, bıyl osyǵan baılanysty júrgizilgen qylmystyq ister azaıdy», - dedi Bekbolat Ánesov. 

Onyń aıtýyna qaraǵanda, qazir IT quraldary arqyly áleýmettik jeliler baqylaýǵa alynǵan. 

«Turǵyndarǵa tanys emes adamdardan kúmándi usynys tússe, ony dereý quqyq qorǵaý organdary nemese Qarjylyq monıtorıng agenttiginiń «Baıqa pıramıda» telegramm boty arqyly anyqtaýǵa bolatynyn eskertemiz. Al, qarjy pıramıdasyn qurǵan adam qylmystyq jaýapkershilikke tartylady. Múlki tárkilenip, 10 jylǵa deıin bas bostandyǵynan aıyrylady», - dep málim etti Bekbolat Ánesov.

Eske sala ketelik, budan buryn Atyraýda alaıaqtyqqa baılanysty 300-ge jýyq qylmystyq is sotqa joldanǵanyn jazǵan edik.