Atyraýda basqarma basshysy eki aı merzimge úıqamaqqa alyndy

<p>ATYRAÝ. KAZINFORM &ndash; Atyraý oblystyq dene shynyqtyrý, sport jáne týrızm basqarmasynyń basshysy Dastanbek Qospanov eki aıǵa úı qamaqta otyrady.</p>

Bul derekti Atyraý oblystyq sotynyń baspasóz qyzmeti rastady. 

«Atyraý qalasynyń mamandandyrylǵan tergeý sotynyń 7 naýryzdaǵy qaýlysymen D.K-ǵa qatysty 2 aı merzimge úıqamaq túrindegi bultartpaý sharasy sanktsııalandy. Buǵan Atyraý oblysy boıynsha sybaılas jemqorlyqqa qarsy qyzmet tergeýshisiniń oblys prokýrorynyń orynbasarymen kelisilgen ótinishhaty negiz boldy», -dep habarlady sottyń baspasóz qyzmeti. 

Atyraý oblysy dene shynyqtyrý basqarmasynyń basshysy para aldy degen kúdikke ilingenin Sybaılas jemqorlyqqa qarsy is-qımyl agenttiginiń resmı ókili Arman Tileýkenov málim etti.

«Atyraý oblysy boıynsha Sybaılas jemqorlyqqa qarsy qyzmet Atyraý oblysy dene shynyqtyrý jáne sport basqarmasynyń basshysyna qatysty qylmystyq isti tergeýde. Laýazymdy tulǵa vedomstvolyq baǵynysty uıymnan sportshylarǵa oqý-jattyǵý jıyndarynan ótýge bólingen qarajattan 1,2 mln teńge somasynda para alý boıynsha kúdikke ilindi», - dedi Arman Tileýkenov vedomstvoda ótken baspasóz máslıhatynda.

Eske sala ketelik, budan buryn Atyraý oblysy dene shynyqtyrý basqarmasy basshysyna qatysty qylmystyq is qozǵalǵany habarlanǵan edi.

Sondaı-aq, Atyraý munaı óńdeý zaýytynyń burynǵy bas dırektory 2 aı úı qamaqta otyratynyn jazǵan bolatynbyz.