Atyraýda básekelestikti qorǵaý zańnamasyn buzǵandardan 690 mln teńge óndirildi
Básekelestikti qorǵaý jáne damytý agenttigi Atyraý oblysy boıynsha departamentiniń basshysy Aıgúl Nábıevanyń aıtýynsha, ótken jyly 53 taýar naryǵyndaǵy básekelestiktiń jaı-kúıine taldaý júrgizlgen.
«Taldaýdyń nátıjesimen 5 sýbektige habarlama berildi. Al 3 sýbektige qatysty tergep-tekserý taǵaıyndaldy. Byltyr básekelestikti qorǵaý zańnamasyn buzǵandarǵa 10 ákimshilik is qozǵalyp, 884 mln teńgeden astam aıyppul salyndy. Aıyppuldyń 690 mln teńgesi memleket paıdasyna óndirildi», -dedi Aıgúl Nábıeva.
Onyń málimetinshe, Atyraý oblystyq prokýratýrasymen birge «Suıytylǵan munaı gazyn saqtaý parki» JShS-niń qyzmeti tekserilgen.
«Tekserýdiń aıasynda básekelestikti qorǵaý salasyndaǵy zańnamany buzý deregi anyqtaldy. Nátıjesinde qalalyq ákimshilik quqyq buzýshylyqtar jónindegi mamandandyrylǵan sotynyń qaýlysymen «Suıytylǵan munaı gazyn saqtaý parki» JShS-ǵa ákimshilik quqyq buzýshylyq jasaǵany úshin 324 mln teńgeden astam mólsherinde ákimshilik aıyppul salyndy. Sondaı-aq, «RTI-AMÓZ», «Batys Trans Group» mekemelerine tergep-tekserý júrgizildi. Nátıjesinde temir jol salasyndaǵy qyzmetterde básekelestikti qorǵaý salasyndaǵy zańnamasyn buzý deregi anyqtaldy. Soǵan baılanysty jalpy kólemi 550 mln astam teńgeni quraıtyn monopolııalyq kiris jáne salynǵan aıyppuldar memleket paıdasyna tolyq kólemde óndirildi», -dep habarlady Aıgúl Nábıeva.
Eske sala ketelik, buǵan deıin Atyraýda sý jetkizýshi kásiporynǵa 5,5 mln teńge aıyppul salynǵanyn habarlaǵan bolatynbyz.