Atyraýda balabaqshada balany urǵan tárbıeshige qatysty tergeý bastaldy

<p>Atyraýda memlekettik balabaqshanyń birinde tárbıeshi balanyń betinen urǵan. Onyń teris áreketine qatysty sotqa deıingi tergeý bastaldy, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Bul derekti oblystyq polıtsııa departamentiniń baspasóz qyzmeti rastady. Oqıǵa keshe, 8 qarashada bolǵan.

«Qazir atalǵan derek boıynsha QR Qylmystyq kodeksiniń 140-babymen (Kámeletke tolmaǵan adamdy tárbıeleý jónindegi mindetterdi oryndamaý) sotqa deıingi tergeý bastaldy. Tergeýge baılanysty qajetti sot medıtsınalyq saraptamalar taǵaıyndaldy. Beınebaqylaý kamerasyndaǵy jazbalarǵa zerdeleý júrgizilip jatyr», - dep habarlady departamenttiń baspasóz qyzmeti.

Belgili bolǵandaı, tárbıeshiniń zańǵa qaıshy áreketi toptaǵy beınebaqylaý kamerasyna túsip qalǵan. Qazir balabaqsha tárbıeshisi qyzmetinen shettetilgen.

Eske sala ketelik, budan buryn Atyraýdaǵy «Shańyraq» balalar aýylynyń eki tárbıeshisi tárbıelenýshilerdi urǵanyn habarlaǵan bolatynbyz.