Atyraýda avtomektep jalǵan júrgizýshi kýáligin taratty degen kúdikke ilindi

<p>Atyraýda jalǵan júrgizýshi kýáligin berý kúdigimen avtomektepterdiń birinde tekserý bastaldy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Oblystyq polıtsııa departamentiniń bastyǵy, polıtsııa polkovnıgi Nurhat Orazbaevtyń aıtýynsha, bul týraly áleýmettik jelide beınejazba taralǵan.

– Atyraý qalasynyń turǵyny avtomektepterdiń birinde kólik júrgizýdi oqytý týraly jalǵan kýálik berýde dep shaǵymdandy. Atalǵan derekke baılanysty Atyraý oblystyq polıtsııa departamentiniń qyzmetkerleri QR Qylmystyq kodeksiniń 385-babynyń 1-bóligimen (Quqyqtar beretin nemese mindetterden bosatatyn kýálikti nemese ózge de resmı qujatty qoldan jasaý, ne mundaı qujatty ótkizý, sol sııaqty qoldan jasalǵan mórtabandardy, mórlerdi, blankilerdi, memlekettik poshta tólemi belgilerin, Qazaqstan Respýblıkasynyń nemese KSRO-nyń memlekettik nagradalaryn daıyndaý nemese ótkizý) sotqa deıingi tergep-tekserýdi bastady, - dep málim etti Nurhat Orazbaev.

Onyń aıtýyna qaraǵanda, qazir qajetti tergeý amaldary júrgizilip jatyr.

Sotqa deıingi tergeýdiń qorytyndysymen avtomektep qyzmetkerleriniń áreketine quqyqtyq baǵa beriledi.

Eske sala ketelik, budan buryn Atyraýda memlekettik Týdy qoqysqa tastaýǵa baılanysty tergeý bastalǵanyn habarlaǵan bolatynbyz.