Atyraýda avtobýstaǵy jolaýshyny uryp, oq atqan eki adam 4 jylǵa sottaldy

<p>ATYRAÝ. KAZINFORM &ndash; Atyraý oblysynda eki buzaqy avtobýsqa kirip, jolaýshyny uryp-soqqan jáne oq atqan. Buzaqylar 4 jylǵa bas bostandyǵynan aıyryldy.</p>

Jylyoı aýdandyq sotynyń aqparatyna súıensek, buzaqylarǵa QR Qylmystyq kodekstiń 293-babynyń 3-bóligimen aıyp taǵylǵan.

«Sottalýshylar A. jáne L. 2023 jylǵy 20 qarashada Jańa Qaraton kentinde armatýra jáne travmatıkalyq tapanshamen qarýlanyp, toqtap turǵan «T» JShS-niń qyzmettik avtobýsyna kirgen. Buzaqylyq nıetpen jolaýshy S.-ny uryp, oǵan qaraı travmatıkalyq tapanshadan eki ret oq atqan. Keıin oqıǵa ornynan qashyp ketken. Qylmystyq áreketiń saldarynan jábirlenýshiniń densaýlyǵyna jeńil zııan kelgen», -dep habarlady sottyń baspasóz qyzmeti.

Prokýror sottalýshylardy 4 jyl merzimge bas bostandyǵynan aıyrý jazasyn taǵaıyndaýdy surady. Al, sottalýshylar kinásin tolyq moıyndady.

«QR Qylmystyq Kodeksiniń 293-babynyń 3-bóliginiń sanktsııasymen 3 jyldan 7 jylǵa deıingi merzimge bas bostandyǵyn shekteý ne sol merzimge bas bostandyǵynan aıyrý túrindegi jaza kózdelgen. Jaza taǵaıyndaý barysynda qylmystyq jaýaptylyq pen jazany jeńildetetin mán-jaılar retinde sottalýshylardyń kinásin moıyndap, shyn júrekten ókingeni, buryn sottalmaǵany eskerildi. Іs boıynsha aýyrlatatyn mán-jaılar anyqtalmady. Sot úkimimen sottalýshylar taǵylǵan aıyppen kináli dep tanylyp, 4 jyl merzimge bas bostandyǵynan aıyrý jazasy taǵaıyndaldy», -dep málim etti sottyń baspasóz qyzmetinen.

Sot úkimi zańdy kúshine engen joq.

Eske sala ketelik, buǵan deıin Atyraýda balalaryn satqan áıel 8 jylǵa sottalǵanyn jazǵan bolatynbyz.