Atyraýda aýyl mektebindegi uldar dárethanasyna beınekamera ornatyp qoıǵan

<p>ATYRAÝ. KAZINFORM — Atyraý oblysynda Sh. Erkinov atyndaǵy orta mekteptegi uldarǵa arnalǵan dárethanaǵa beınekamera ornatyp qoıǵan.</p>

Qyzylqoǵa aýdanynyń Jasqaırat aýylyndaǵy orta mekteptiń dırektory Táttigúl Qalıevanyń túsindirýinshe, dárethanadaǵy múlik birneshe ret búlingen. Dárethanada usaq buzaqylyq jasalatyn bolǵan. 

«Osyǵan baılanysty Sh. Erkinov atyndaǵy orta mektepte qoljýǵyshtarǵa baǵyttalǵan beınekamerany ornatý qajettiligi týyndady. Bul rette eshkimniń quqyǵy buzylǵan joq. Ornatý týraly sheshim mektep ákimshiligimen jáne qamqorshylar keńesiniń basshysymen birlesip qabyldanǵan edi. Mundaı sheshim tártip saqtaý jáne buzaqylyq faktileriniń aldyn alý maqsatynda qabyldandy. Kameranyń jazbasyn tekserý tek meniń quziretimde», -deıdi Táttigúl Qalıeva. 

Atyraý oblystyq bilim basqarmasynyń baspasóz qyzmetinen málim etkendeı, Qyzylqoǵa aýdanyndaǵy Sh. Erkinov atyndaǵy orta mekteptegi uldar kiretin dárethanadaǵy beınekamerany alyp tastaý jóninde sheshim qabyldanǵan.

Foto: Atyraý oblysy bilim basqarmasy

«Qazir Atyraý oblystyq bilim basqarmasy janynan osy faktini zerdeleýmen aınalysatyn komıssııa quryldy. Komıssııa tekserisiniń nátıjesi týraly qosymsha habarlanady», -dep málim etti basqarmanyń baspasóz qyzmetinen.

Eske sala ketelik, buǵan deıin Atyraýda eki mektepte jarylǵysh zat qoıylǵany jóninde jalǵan habar berilgenin habarlaǵan bolatynbyz.