Atyraýda áskerı bólimniń jas sarbazdary 30 shaqyrymdyq jaıaý joryqqa shyqty

<p>Atyraý garnızonyndaǵy áskerı bólimniń jas sarbazdary 30 shaqyrymǵa sozylǵan qashyqtyqty jaıaý júrip ótti, dep habarlaıdy <a href="Kazinform." target="_blank" rel="noopener">Kazinform.</a></p>

Atyraý garnızonynyń baspasóz qyzmetinen málim etkendeı, jaıaý joryqqa №41433 áskerı bóliminiń quramy qatysqan. Maqsat – barlyq deńgeıdegi áskerı qyzmetshilerdiń teorııalyq bilimin, jer bederin baǵdarlaý men tózimdiligin tekserý. 

«Bólimsheler quramynda áskerı qyzmetshiler jaıaý júrispen 30 shaqyrymdyq joryq jasady. Bul úshin arnaıy bólim aýmaǵynda oqytý sabaǵy uıymdastyryldy. Jaıaý joryq – vzvod nemese rota quramyndaǵy áskerılerge júkteletin qarapaıym mindet emes. Eń aldymen, bul barlyq deńgeıdegi komandırlerdiń joryqty josparlaýǵa jáne uıymdastyrýǵa baılanysty jumysyn qamtıdy. Jas sarbazdar jaıaý joryqta jaqsy nátıje kórsetti. Al, komandırler bólimshelerdi basqarýda joǵary kásibıligin tanytty», - deıdi áskerı bólim komandıriniń orynbasary, podpolkovnık Vladımır Tsýkanov.

Foto: Atyraý garnızonynyń baspasóz qyzmeti

Onyń aıtýynsha, jaıaý joryqta sarbazdardyń jaýyngerlik daıyndyǵyn jetildirýge de mán berilgen.

«Búgin áskerı daıyndyǵymyzdy jetildirgen jaıaý joryq aıaqtaldy. Sarbazdar aýa-raıynyń qolaısyzdyǵyna qaramastan, áskerı rýhy, daıyndyǵy myqty ekenin dáleldedi. Qazaqstan Qarýly Kúshteriniń áskerlerine jyl maýsymyndaǵy tabıǵat qubylysy eshqashan kedergi keltirmeıdi. Óıtkeni, sarbazdar sapaly ári jyly kıimmen, ózge de qajetti qurylǵylarmen qamtyldy. Jaýyngerlik daıyndyqtan ótken bólimshelerdiń jas sarbazdary bizdiń Otanymyzdyń naǵyz shyńdalǵan ári batyl qorǵaýshysyna aınaldy», - dep málim etti Vladımır Tsýkanov.

Eske sala ketelik, budan buryn Atyraý oblysynan kúz aılarynda 492 bozbala áskerge attanǵanyn jazǵan edik.