Atyraýda alǵash ret qaterli isikke shaldyqqan naýqastyń ókpesine torakoskopııa otasy jasaldy

<p>ATYRAÝ. KAZINFORM — Atyraý dárigerleri qaterli isigi bar naýqastyń ókpesine torakoskopııa otasyn jasady. Bul — jergilikti onkologııa dıspanserindegi alǵashqy ota. </p>

Atyraý oblystyq densaýlyq saqtaý basqarmasynyń baspasóz qyzmetinen málim etkendeı, sol jaq sút bezinde qaterli isigi bar naýqasqa buryn ota jasalǵan. Sodan soń hımıoterapııa, sáýle emi taǵaıyndalǵan. 

«Naýqas josparlanǵan emdeý kýrsyn udaıy alyp júrdi. Biraq, qazir naýqasta metastazynyń órshigeni anyqtaldy. Sol sebepten, isiktiń ókpe men bas mıyna taralýynyń aldyn alý taktıkasy josparlandy. Ókpeniń tómengi sol jaq bóligine atıpıkalyq rezektsııa jasalyp, toraskopııalyq ota arqyly isik alyndy. Torakoskopııa — ókpe qýysyndaǵy aýrýlardy, isikterdi tekserý jáne alý úshin qoldanylatyn az ınvazıvti protsedýra túri. Dál osy ota oblystyq onkologııa dıspanserinde alǵash ret jasalyp otyr», — dep habarlady basqarmanyń baspasóz qyzmeti.

Bul otany jasaýǵa hırýrgııa bóliminiń meńgerýshisi, onkohırýrg Maqsat Shamshenov jetekshilik etken dárigerler toby qatysqan. Top quramynda Aqylbek Aıtýǵanov, Altynshash Dúısenalıeva, anestezıolog-reanımatolog Alıakbar Imamatdınov bar. Jergilikti dárigerlerdiń alǵashqy otasy sátti aıaqtalǵan. Qazir naýqas dárigerlerdiń baqylaýyna alynǵan.

Eske sala ketelik, buǵan deıin Atyraý oblysy ákiminiń grantymen joǵary bilim alǵan 13 dáriger jumysqa ornalasqanyn habarlaǵan bolatynbyz.