Atyraýda áleýmettik nysandarǵa jylý berile bastady
Atyraý qalalyq turǵyn úı ınspektsııasy bólimi basshysynyń orynbasary Qaırat Habıevtyń málimetinshe, bıylǵy jylytý maýsymyna daıyndyqqa 727 mln 471 myń teńge bólingen. Jylytý maýsymyna kópqabatty 1228 turǵyn úı daıyndalǵan.
«Bıyl jylytý maýsymyna daıyndyq kezinde jalpy uzyndyǵy 8 800 metr jylý jáne ystyq sý qubyrlaryna jóndeý júrgizildi. Bul jumysqa 300 mln 463 myń teńge jumsaldy. Al 143 mln teńgege 12 jylý berý beketine 6 jylý qazany, 12 generator, 4 jylý almastyrǵysh jáne 27 sorǵy qurylǵysy satyp alyndy. «AtyraýJylýJúıeleri» AQ-nyń senimgerlik teńgerimine 11 ortalyq jylý beketi berilip, jylý maýsymy kezeńinde kútip-ustaýǵa 284 mln teńge bólindi. Qazir atalǵan mekememen kelisimshart jasaldy», - dep habarlady Qaırat Habıev.
«QazTransGazAımaq» AQ Atyraý óndiristik fılıalynyń dırektory Erkebulan Kenjeǵalıevtyń aıtýynsha, óńir turǵyndarynyń 99,8 paıyzy tabıǵı gaz jelisine qosylǵan.
«Turǵyndarǵa birinshi kezekte qaýipsizdik erejelerin saqtaýdy eskertemiz. Jylý qazandyǵyn qospas buryn tútin murjalaryn tazalap, jeldetý arnalaryn, jylytý júıelerin muqııat tekserý qajet», – dep málim etti Erkebulan Kenjeǵalıev.
Eske sala ketelik, budan buryn Atyraý oblysynyń qysqy jylytý maýsymyna daıyndyǵy 87 paıyz ekenin jazǵan edik.