Atyraýda 90 shaqyrymdyq at báıgesiniń jeńimpazy 2 mln teńge utyp aldy
Atyraýda «Uly dala joryǵy» jobasy aıasyndaǵy alǵashqy báıge marafony Mahambet aýdanynda uıymdastyrylyp otyr. Ony oblystyq báıge federatsııasy ótkizdi. Sporttyq is-sharaǵa oblys ákimdigi men oblystyq dene shynyqtyrý, sport jáne týrızm basqarmasy qoldaý kórsetti.
Qylquıryqty júırikterdiń alamanynda Qyzylqoǵa aýdanynyń úsh júırigi alǵashqy úsh júldeni ıelendi. Muqyr aýylynda turatyn Taıjanovtar áýleti qosqan «Nurtóbel» júırigi márege birinshi bolyp jetti. Jeldeı esken júırikti atbegi Áleke Bóltekov baptaǵan. Al, shabandozy – Baqytjan Jetkizgen. Jeńimpaz júıriktiń ıesine 2 mln teńge berildi.
Al, ekinshi júldeniń syıaqysy – 1 mln teńgeni Mııaly aýylynyń turǵyny Qaıyrbek Baımuratovtyń «Aıtumar» júırigi ıelendi. Aýyzdyǵymen alysqan bul júırikti de Áleke Bóltekov baptasa, shabandozy – Isa Jańǵabyl.
Máre syzyǵyn úshinshi bolyp qıǵan «Kúnqasqa» tulparyn Taısoıǵan aýylynyń turǵyny Esenǵabyl Qosaev qosty. «Kúnqasqanyń» shabandozy Dosjan Dosqalı 800 myń teńgege ıe boldy.
Bir ereksheligi, bul báıge marafonynda 10 júlde taǵaıyndalǵan. Máselen, tórtinshi orynǵa 700 myń, besinshige – 600 myń, altynshyǵa – 500 myń, jetinshige – 400 myń, segizinshige – 300 myń, toǵyzynshyǵa – 200 myń, al, 10-shy oryn ıegerine 100 myń teńge berildi.
Eske sala ketelik, buǵan deıin atyraýlyq aspaz Túrkııadaǵy gastrofestıvalde birinshi oryn alǵany habarlanǵan edi.