Atyraýda 8 kásiporynnyń 75 jumysshyǵa 43,2 mln teńge jalaqy qaryzy bolǵan

<p>ATYRAÝ. KAZINFORM &ndash; Atyraý oblysynda 8 kásiporynnyń 75 jumysshyǵa 43,2 mln teńge jalaqy qaryzy bary anyqtalǵan. Al, eńbek zańdylyǵyn buzǵan kompanııalarǵa 8,8 mln teńge aıyppul salynǵan.</p>

Atyraý oblystyq memlekettik eńbek ınspektsııasy basqarmasy basshysynyń mindetin atqarýshy Kemel Imanǵalıevtyń málimetinshe, jospardan tys júrgizilgen 90 tekserý kezinde zańmanany buzǵan 43 derek anyqtalǵan. 

«Jyl basynan beri basqarmaǵa 1200-den astam ótinish tirkelgen. Eńbek ınspektorlary 1159 ótinishti qarady. Al, qalǵan ótinishter ózge quzyrly organdarǵa joldandy. Osy kezeńde eńbek qatynasy boıynsha 938 azamattyń konstıtýtsııalyq quqyqry qorǵaldy. Quqyq buzýshylarǵa 43 zańsyzdyqty joıý týraly 29 uıǵarym berilip, 35 ákimshilik hattama toltyryldy. Nátıjesinde zań buzǵandarǵa 8,8 mln teńge aıyppul salyndy», -dep habarlady Kemel Imanǵalıev. 

Onyń aıtýynsha, basqarmaǵa túsetin ótinishterdiń basym bóligi jumysshynyń eńbekaqysyna baılanysty bolyp otyr.

«Jumysshynyń eńbekaqysyn tólemeý jáne keshiktirý jaǵdaıyna jol bermeý maqsatynda tıisti ýákiletti organdarmen birge túsindirý júrgizildi. Eńbek daýyna baılanysty tekserý nátıjesinde oblystaǵy 8 kásiporynnyń 75 jumysshyǵa 43,2 mln teńge jalaqy bereshegi bary anyqtaldy. Qabyldanǵan tıimdi sharalardyń nátıjesinde qyzmetkerlerdiń jalaqylary tólenip, eńbek quqyǵy qorǵaldy»,- dep málim etti Kemel Imanǵalıev.

Eske sala ketelik, buǵan deıin Atyraý oblysynda balalaryna alıment tólemegen boryshkerler qamaýǵa alynǵanyn jazǵan edik.