Atyraýda 74 jastaǵy qarııa úıiniń aýlasynda 117 túp qarasora ósirgen
Atyraý oblysy polıtsııa departamentiniń baspasóz qyzmetinen málim etkendeı, eki derekti de ekstremızmge qarsy is-qımyl basqarmasynyń qyzmetkerleri jedel-izdestirý sharasy kezinde anyqtaǵan.
«Polıtsııa qyzmetkerleri Atyraýda 54 jastaǵy turǵyndy qarasora ósirip, keptirilgen marıhýana saqtaǵany úshin ustady. Kúdiktiniń turǵylyqty meken-jaıyn tintý júrgizilip, 3 kelige jýyq qarasora jáne keptirilgen marıhýana tárkilendi. Al, 74 jastaǵy qarııa óziniń turǵyn úıiniń aýlasynda 117 túp qarasora ósimdigin ósirgeni anyqtaldy. Zeınet jasyndaǵy kúdiktiniń zańsyz áreketiniń dáleli retinde aıǵaq zattar tárkilenip alyndy», - dep habarlady departamenttiń baspasóz qyzmeti.
Qazir polıtsııa qyzmetkerleri eki kúdiktige qatysty qylmystyq is qozǵady. Sotqa deıingi tergeý amaldary júrgizý bastaldy. Ózge aqparat tergeý múddesine sáıkes jarııalaýǵa jatpaıdy.
Eske sala ketelik, buǵan deıin Atyraý polıtseıleri zańsyz aınalymnan 7,8 tonna prekýrsor tárkilegenin habarlaǵan edik.
Sondaı-aq 37 jastaǵy er adamnan 8 mln teńgeniń sıntetıkalyq esirtkisi tárkilengenin jazǵan bolatynbyz.