Atyraýda 74 alaıaqtyq qylmysyn jasaǵan 11 adamnyń isi sotqa joldandy
Atyraý qalalyq polıtsııa basqarmasynyń jedel ýákili Dýman Nazarbektiń aıtýynsha, bıyl alaıaqtyq qylmysynyń kúrt óskeni baıqalady.
«Jyl basynan beri oblys aýmaǵynda ınternettegi alaıaqtyqqa qatysty 836 qylmys tirkeldi. Onyń ishinde 102 qylmys ashyldy. Biraq, bul kórsetkish ótken jylǵymen salystyrǵanda 213 qylmysqa artyp otyr. Ashylǵan 102 qylmysqa qatysy bar 49 adam anyqtaldy. Al, 11 adamnyń oblys aýmaǵynda 74 alaıaqtyq qylmysyn jasaǵany dáleldenip, qylmystyq is sotqa joldandy», - dep habarlady Dýman Nazarbek.
Onyń pikirinshe, ınternettegi alaıaqtyqtyń órshýine áser etetin birneshe faktor bar. Birinshiden, turǵyndardyń qarjylyq saýatynyń tómendigi sebep bolyp otyr. Ekinshiden, turǵyndar aqparattyq tehnologııalar salasyndaǵy biliktiligin jetildirmeıdi. Úshinshiden, Atyraý oblysynda ózge óńirlerge qaraǵanda, tabys pen qarjy aınalymynyń joǵary deńgeıde ekeni yqpal etedi.
«Turǵyndarǵa ınternet alaıaqtardan saq bolý úshin birneshe qarapaıym tásildi eskerýdi usynamyz. Birinshiden, derbes derekterdiń qaýipsizdigine nazar aýdarý qajet. Ekinshiden, bankten qarjy alatyn plastıkalyq kartalardaǵy jeke málimetterdi, pın-kodtar men qupııa sózderdi eshkimge habarlamaǵan jón. Úshinshiden, belgisiz ári tekserilmegen saıttar arqyly aldyn ala tólem júrgizbeýge, kúmándi mámileler boıynsha aqsha aýdarymdaryn júzege asyrýǵa asyqpaý kerek. Tórtinshiden, mobıldi telefon men kompıýterge belgisiz qosymshalardy ornatpaý, kúdikti siltemeni baspaý, spam túrindegi habarlamalarǵa senbeý jón ekenin qaperge beremiz», - dep málim etti Dýman Nazarbek.
Eske sala ketelik, buǵan deıin Atyraýda tutynýshynyń aqshasyn qumar oıynǵa jumsaǵan áıel sottalǵanyn jazǵan bolatynbyz.
Atyraý soty úsh jylǵa sottalǵan atyraýlyqtyń jazasy bas bostandyǵyn shekteýge aýystyrdy.