Atyraýda 562 otbasy 75 mln teńgeniń ataýly áleýmettik kómegin alǵan

<p>ATYRAÝ. KAZINFORM &ndash; Atyraý oblysynda 1 naýryzǵa deıin 562 otbasyna 75 mln teńgeniń ataýly áleýmettik kómegi berilgen. Bul otbasylarda 3 356 adam bar.&nbsp;</p>

Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń baspasóz qyzmetinen málim etkendeı, byltyrǵy kórsetkishpen salystyrǵanda, bıyl shartty aqshalaı kómek alýshylar sany azaıǵan.

«Ataýly áleýmettik kómek 403 otbasyndaǵy 2 574 adamǵa shartty aqshalaı, 159 otbasyndaǵy 782 adamǵa shartsyz aqshalaı kúıinde taǵaıyndaldy. Mundaı kómekti alýshylarǵa jasalǵan taldaýǵa sáıkes, 18 jasqa deıingi jasóspirimderdiń úlesi 69 paıyzdy qurady. Al, jumyssyzdar – 2,7, basqa sanattaǵylar – 28,3 paıyz. Jumysy barlar – 10,3, zeınetkerler – 0,5, múgedekter – 0,7, stýdentter – 4,1 paıyz. Bala kútimindegi otyrǵandar 11,6, basqalary –1,1 paıyzdy quryp otyr», - dep habarlady basqarmanyń baspasóz qyzmeti. 

Shartty aqshalaı kómek alǵan 403 otbasyndaǵy 92 jumyssyzdyń 79 paıyzy jumyspen qamtý sharalaryna tartylǵan. Onyń ishinde 8-i turaqty, 60-y qoǵamdyq, 5-ýi áleýmettik jumysqa jiberilgen.

«Óńirde ataýly áleýmettik alýshylar óz isin ashýǵa qaıtarymsyz grant, al, jastar 2,5 paıyz jeńildikpen mıkrokredıt ıelenýge, qaıta daıarlaý kýrstarynan ótýge úmitker bola alady. Al, 488 otbasyndaǵy 1-den 6 jasqa deıingi 943 balaǵa 9,9 mln.teńgege qosymsha tólem berildi», -dep málim etti basqarmanyń baspasóz qyzmeti.

Eske sala ketelik, buǵan deıin Atyraýda apatty úılerde turatyn 24 otbasyǵa jańa baspana berilgenin jazǵan bolatynbyz.