Atyraýda 51 jastaǵy áıel emhanada alǵan ýkoldan soń kóz jumdy

<p>Atyraý qalasyndaǵy №1 emhanada ýkol alǵan 51 jastaǵy áıel qaıtys bolǵan. Bul derekti Atyraý oblystyq densaýlyq saqtaý basqarmasynyń baspasóz qyzmeti rastady, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Oqıǵa 14 jeltoqsanda Atyraý qalasyndaǵy №1 emhanada bolǵan. Sol kúni emhanada shamamen saǵat 9:15 shamasynda 1972 jylǵy áıelge ýkol salynǵan. Alaıda, patsıenttiń jaǵdaıy nasharlaǵan. Emhana dárigerleri jedel járdem shaqyrǵan. 

Biraq, saǵat 9:51 shamasynda patsıenttiń bıologııalyq ólimi tirkelgen. Qazir sot-medıtsınalyq saraptama taǵaıyndaldy.

Eske sala ketelik, budan buryn Atyraýda jas bosanǵan áıeldiń qazasyna qatysy bar dárigerlerge sot úkimi shyqqanyn jazǵan bolatynbyz. 

Atyraý qalasynyń №2 sotynda oblystyq aýrýhanasynyń 6 dárigerine qatysty qylmystyq is qaraldy. Dárigerlerge QR Qylmystyq kodeksiniń 317-babynyń 3-bóligimen aıyp taǵylǵan.

«Sottalýshylar A., T. jáne A.-nyń jazasy men qylmystyq jaýaptylyǵyn jeńildetetin mán-jaılar retinde olardyń otbasylyq jaǵdaıy eskerildi. Aýyrlatatyn mán-jaılar anyqtalmady. Sot úkimimen A., T., A. QR Qylmystyq kodekstiń 317-babynyń 3-bóligimen kináli dep tanyldy», - dep málim etti sottyń baspasóz qyzmetinen. 

Sottalýshylarǵa 3 jyl merzimge dárigerlik qyzmetpen aınalysý quqyǵynan, 2 jyl 6 aı merzimge bas bostandyǵynan aıyrý jazasy taǵaıyndalyp, T. jáne A.-ǵa 63-bap qoldanyldy. Endi olar jazasyn shartty túrde óteıdi. 

Al, 3 sottalýshy E., S. jáne K.-nyń áreketinde qylmystyq quqyq buzýshylyqtyń quramy bolmaýyna baılanysty aqtaldy.