Atyraýda 5 saǵat buryn polıtseıden eskertý alǵan júrgizýshi adam ólimine sebepshi bolǵan

<p>Atyraýlyq júrgizýshi kúndiz kólik jyldamdyǵyn asyrǵany úshin polıtseıden eskertý alǵan. Alaıda 5 saǵat ótkennen soń jol apatyn jasap, ózge júrgizýshiniń kóz jumýyna sebepker bolǵan, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Atyraý oblystyq Polıtsııa departamenti baspasóz qyzmetiniń aqparatyna qaraǵanda, jol-kólik oqıǵasy keshe, 22 jeltoqsanda bolǵan.

«Jergilikti ýaqytpen saǵat 20:00 shamasynda Aqtóbe-Atyraý-Reseı federatsııasynyń shekarasy (Astrahan baǵyty) tas jolynyń 513-514 shaqyrymy aralyǵynda Toyota Avalon jáne VAZ-2114 avtokólikteri soqtyǵysty. Jol apatynyń saldarynan VAZ-2114 avtokóliginiń 1988 jylǵy júrgizýshisi oqıǵa ornynda qaıtys boldy. Qazir jol-kólik oqıǵasyna qatysty tıisti is qujattary jınaqtalyp jatyr», - dep habarlady departamenttiń baspasóz qyzmeti.

Belgili bolǵandaı, patrýldik polıtsııa rotasynyń qyzmetkerleri kúndizgi saǵat 15:00 shamasynda Toyota Avalon avtokóliginiń 1999 jylǵy júrgizýshisine QR Ákimshilik quqyq buzýshylyq týraly kodeksiniń 592-babynyń 1-bóligimen (Belgilengen júrý jyldamdyǵyn arttyrý) ákimshilik hattama toltyrǵan. Atalǵan júrgizýshiniń buǵan deıin atalǵan qujattyń 592-babynyń 1,3,4-bóligimen, 593-baptyń 1,3-bóligimen, 600-baptyń 1-bóligimen boıynsha ákimshilik jaýapkershilikke tartylyp, birneshe ret eskertý alǵany anyqtalǵan.

«Alaıda kólik júrgizýshisi 5 saǵat buryn eskertý alǵanyna qaramastan jol apatyn jasap, ózge júrgizýshiniń kóz jumýyna sebepker bolyp otyr. Osyǵan baılanysty júrgizýshiler nazaryna jolda júrý erejelerin qatań saqtaýdy eskertemiz», - dep málim etti departamenttiń baspasóz qyzmetinen.

Eske sala ketelik, budan buryn Atyraý oblysynda jyl basynan beri jol apatynan 89 adam mert bolǵanyn jazǵan edik.