Atyraýda 5-qabattan qulaǵan jasóspirimniń ólimine qatysty tergeý bastaldy

<p>ATYRAÝ. KAZINFORM &ndash; Atyraý qalasynda jasóspirim 5-qabattan qulap, kóz jumdy. Qazir jasóspirimniń ólimine qatysty tergeý júrip jatyr.</p>

Atyraý oblystyq polıtsııa departamentiniń baspasóz qyzmetinen málim etkendeı, oqıǵa keshe, 28 shildede bolǵan. 

«Atyraý qalasynda 28 shilde kúni saǵat 06:30 shamasynda 2009 jylǵy jasóspirim kópqabatty úıdiń 5-qabatynan qulap, oqıǵa ornynda qaıtys boldy. Polıtsııa qyzmetkerleri jasóspirimniń ólimine qatysty óz-ózine qol jumsaýǵa jetkizý deregimen qylmystyq is qozǵady. Qazir keshendi tergeý amaldary júrgizilip jatyr», - dep habarlady departamenttiń baspasóz qyzmeti. 

Ózge aqparat tergeý múddesine sáıkes jarııalaýǵa jatpaıdy.

Eske sala ketelik, buǵan deıin Atyraý oblysynda jyl basynan beri 6 bala terezeden qulaǵanyn jazǵan bolatynbyz. 

Atyraý oblystyq tótenshe jaǵdaılar departamenti tótenshe jaǵdaılardyń aldyn alý bóliminiń bastyǵy, azamattyq qorǵaý maıory Sábıt Borashevtyń aıtýynsha, keıingi kezde balalardyń jazataıym oqıǵaǵa ushyraýy jıilegen. 

«Ásirese, 2-7 jasqa deıingi balalardyń terezeden qulaýy kóbirek kezdesedi. Negizgi sebep – ońaı ashylatyn plastıkalyq tereze. Ata-analar balalarynyń qaýipsizdigine salǵyrttyq tanytady. Kópshiligi balalaryn úıinde qaraýsyz qaldyryp ketedi. Osyndaı sebeptiń saldarynan jyl basynan beri 6 bala terezeden qulady», - dep málim etken edi Sábıt Borashev.