Atyraýda 3-qabattan qulaǵan 6 jasar bala aýrýhanaǵa tústi

<p>ATYRAÝ. KAZINFORM &ndash; Atyraý qalasynda 6 jasar bala turǵyn úıdiń 3-qabatyndaǵy terezesinen qulap ketti. Qazir aýyr dene jaraqaty bar bala aýrýhanada jatyr.</p>

Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, oqıǵa keshe, 29 shildede bolǵan. 

«Túsqaıta saǵat 16:00 shamasynda Atyraý qalasynyń B.Qulmanov kóshesinde ornalasqan 6 qabatty turǵyn úıdiń 3-qabatyndaǵy terezesinen 6 jasar bala qulap ketti. Ol aýyr dene jaraqatyn alǵan. Terezeden qulaǵan bala jedel járdem brıgadasynyń kóligimen oblystyq balalar aýrýhanasyna jetkizildi», -dep habarlady departamenttiń qoǵammen baılanys toby.

Tótenshelikterdiń málimetinshe, bul – jyl basynan beri tirkelgen jetinshi derek. 

Buǵan deıin Atyraý oblystyq tótenshe jaǵdaılar departamenti tótenshe jaǵdaılardyń aldyn alý bóliminiń bastyǵy, azamattyq qorǵaý maıory Sábıt Borashev 6 balanyń terezeden qulaǵanyn aıtqan edi. 

«Keıingi kezde balalardyń jazataıym oqıǵaǵa ushyraýy jıiledi. Ásirese, 2-7 jasqa deıingi balalardyń terezeden qulaýy kóbirek kezdesedi. Negizgi sebep – ońaı ashylatyn plastıkalyq tereze. Ata-analar balalarynyń qaýipsizdigine salǵyrttyq tanytady. Kópshiligi balalaryn úıinde qaraýsyz qaldyryp ketedi. Osyndaı sebeptiń saldarynan jyl basynan beri 6 bala terezeden qulady», - degen edi Sábıt Borashev.