Atyraýda 20 kún sabaqqa barmaǵan oqýshynyń anasyna aıyppul salyndy

<p><strong>ATYRAÝ. KAZINFORM - Atyraýda 3-synyp oqýshysy 20 kún boıy sabaqqa barmaǵan. Ulynyń dálelsiz sabaqtan qalǵany úshin anasyna aıyppul salyndy.&nbsp;</strong></p>

Atyraý oblystyq soty baspasóz qyzmetiniń aqparatyna qaraǵanda, oqýshynyń sabaqtan qalýyna anasy kináli dep tanylǵan.

«Atyraý oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynda QR Ákimshilik quqyq buzýshylyq týraly kodeksiniń 127-babynyń 1-bóligimen ákimshilik quqyq buzýshylyq týraly is qaraldy. Sotta anyqtalǵandaı, quqyq buzýshy J.-nyń uly, 3-synyp oqýshysy dálelsiz sebeptermen 20 kún boıy sabaqqa qatyspaǵan. Oqýshynyń anasy J. kámeletke tolmaǵan balany tárbıeleý, oǵan bilim berý, sondaı-aq kútim jasaý jáne kútip-baǵý jónindegi mindetterin oryndamaǵan», - dep habarlady sottyń baspasóz qyzmeti.

Quqyq buzýshy J. óziniń kinásin moıyndap, áreketine ókinetinin bildirgen. Sot qaýlysymen kámeletke tolmaǵan balanyń anasy kináli dep tanyldy.

«Sot sheshim qabyldar kezde quqyq buzýshynyń jeke basy, otbasylyq jáne materıaldyq jaǵdaıy, quqyq buzýshylyqtyń sıpaty eskerdi. Sot qaýlysymen kámeletke tolmaǵan uldyń anasyna 24 myń 150 teńge kóleminde ákimshilik aıyppul salý jazasy taǵaıyndady», - dep málim etti sottyń baspasóz qyzmetinen.

Sot qaýlysy zańdy kúshine engen joq.

Eske sala ketelik, buǵan deıin Atyraý oblysynda kámeletke tolmaǵan jasóspirim sýıtsıd jasaǵanyn jazǵan edik.

Sondaı-aq, Atyraý oblysynyń ákimi qylmys jasaǵan balanyń ata-anasyn quqyǵynan aıyrýdy usyndy.