Atyraýda 2 balabaqsha esepshileri bıýdjet qarjysyn jeke esepshotqa aýdaryp jibergen

<p>ATYRAÝ. KAZINFORM — Atyraý oblysynda eki balabaqshadaǵy esepshilerdiń bıýdjet qarjysyn maqsatsyz jumsaǵany anyqtaldy. Biri qarjyny óziniń, ekinshisi ózimen birge 2 áriptesine jáne jumys istemeıtin adamdardyń jeke esepshotyna negizsiz aýdarǵan.</p>

Atyraý oblystyq ishki memlekettik aýdıt departamenti basshysynyń orynbasary Zoıa Saparovanyń aıtýynsha, balabaqshanyń biri Inder aýdanynda ornalasqan. 

«Osyndaǵy «Jaýqazyn» balabaqshasyna aýdıtorlyq is-shara júrgizilgen edi. Aýdıt qorytyndysymen jalpy somasy 9 mln 539 myń teńgeniń qarjylyq buzýshylyǵy anyqtaldy. Balabaqsha basshysy tarapynan qarjynyń shyǵysyna, júrgizilgen operatsııalardyń durystyǵyna tıisti qadaǵalaý jasalmaǵan. Sonyń saldarynan mektepke deıingi tárbıe berý mekemesiniń esepshisi 2022-2023 jyldary óziniń jeke kartasynyń esepshotyna qarjy aýdarǵan. Bul úshin dırektordyń elektrondyq tsıfrlyq qoltańbasyn paıdalanǵan», — dedi Zoıa Saparova.

Onyń aıtýyna qaraǵanda, qarjylyq buzýshylyqqa balabaqsha esepshisine qatysty qylmystyq is qozǵalǵan. Sottyń sheshimimen esepshi kináli dep tanylǵan. Osyǵan uqsas taǵy derek Qyzylqoǵa aýdanyndaǵy «Balaýsa» balabaqshasynda tirkelgen. 

«Aýdıtorlyq is-sharanyń aýdıt nátıjesinde jalpy somasy 26 mln 366 myń teńgeniń qarjylyq buzýshylyǵy anyqtaldy. Esepshi dırektordyń elektrondyq tsıfrlyq qoltańbasyn paıdalanyp, óziniń, 2 qyzmetker men balabaqshada jumys istemeıtin tulǵalardyń banktegi jeke shotyna qarjyny negizsiz aýdarǵany belgili boldy», — dep málim etti Zoıa Saparova.

Atalǵan balabaqshanyń bas esepshisine qatysty qylmystyq is qozǵalyp, tergeý aıaqtalǵan. Qazir qylmystyq is sotta qaralyp jatyr. 

Eske sala keteıik, budan buryn Atyraý oblysynda 85 laýazymdy tulǵaǵa 14,5 mln teńge aıyppul salynǵanyn jazǵan bolatynbyz.

Sondaı-aq, Atyraýda 8 laýazymdy tulǵa tártiptik jaýapkershilikke tartylǵanyn habarlaǵan edik.