Atyraýda 13 jastaǵy jasóspirimge qatarlasy álimjettik jasady: polıtsııa tergeýdi bastady

<p>ATYRAÝ. KAZINFORM - Atyraýdaǵy orta mektepte 13 jastaǵy jasóspirimniń qurdasyna álimjettik jasaǵan sáti vıdeoǵa túsip qalǵan. Qazir polıtsııa qyzmetkerleri tergeýdi bastady.&nbsp;</p>

Atyraý oblystyq Polıtsııa departamenti baspasóz qyzmetiniń málimetinshe, oqıǵa keshe, 12 aqpanda jergilikti ýaqytpen saǵat 18:00 shamasynda bolǵan.

«Atyraý qalasyndaǵy №42 mektepte 2011 jylǵy jasóspirimder arasynda ózara kelispeýshilik týyndaǵan. Ol sát bilim ordasyndaǵy beınebaqylaý kamerasyna túsken. Vıdeo áleýmettik jelige de taraǵan. Atalǵan derekke qatysty quqyq buzýshylyq jasaǵan jasóspirimder men kýágerler polıtsııa bólimine jetkizildi. Polıtsııaǵa jábirlenýshi jasóspirimniń ákesinen shaǵym tústi. Soǵan baılanysty 2011 jylǵy jasóspirimniń zańdy ókiline qatysty QR Ákimshilik quqyq buzýshylyq týraly kodeksiniń 127-babynyń 1-bóligimen ákimshilik hattama toltyryldy. Sot-medıtsınalyq saraptamasy taǵaıyndaldy», - dep habarlady departamenttiń baspasóz qyzmeti.

Sondaı-aq, búgin, 13 aqpanda oblystyq Polıtsııa departamenti bastyǵynyń birinshi orynbasary, polıtsııa polkovnıgi Ábdiǵanı Seıdýalıev pen jergilikti polıtsııa qyzmeti basqarmasynyń bastyǵy, polıtsııa polkovnıgi Erlan Bıǵambaev jasóspirimder janjaldasqan mekteptiń oqýshylarymen kezdesý ótkizdi.

«Jasóspirimder quqyq buzýshylyq jasaǵan kezde bolashaǵyna kesiri tıetinin oılamaıdy. Olarǵa quqyq buzýshylyqtyń zardaby men jat ádet-qylyqtan aýlaq bolýdyń tıimdiligi týraly túsindirdik. Kámeletke tolmaǵandardyń tárbıesine, teris áreketine ata-anasy jaýap beredi», - deıdi Ábdiǵanı Seıdýalıev.

Eske sala ketelik, budan buryn Atyraý oblysy ákimi qylmys jasaǵan balanyń ata-anasyn quqyǵynan aıyrýdy usynǵanyn jazǵan edik.