Atyraýda 101 jol-kólik oqıǵasynan 16 jasóspirim mert bolǵan

<p>ATYRAÝ. KAZINFORM &mdash; Atyraý qalasynda byltyr 101 jol-kólik oqıǵasynan 16 jasóspirimniń mert bolǵany anyqtalyp otyr. Al, 100-den astamy túrli dene jaraqatyn alǵan.</p>

Atyraý oblystyq polıtsııa departamenti baspasóz qyzmetiniń aqparatyna qaraǵanda, balalardyń qaýipsizdigin qamtamasyz etý máselesi erekshe baqylaýǵa alynǵan. Bul balalardyń joldaǵy qaýipsizdigine, jol-kólik oqıǵasyna ushyramaýyna septigin tıgizedi.

«Atyraý qalasynyń aýmaǵynda jasóspirimderdiń jol qıylystaryndaǵy jaıaý júrginshilerge arnalǵan jolaqtan, baǵdarshamnyń jasyl túsi janǵanda ótý daǵdylaryn úıretý úshin profılaktıkalyq is-sharalar júrgizilip keledi. Soǵan qaramastan ótken jyly 101 jol-kólik oqıǵasynan 16 jasóspirim qaza tapty. Túrli dene jaraqatyn 100-den asa jasóspirim aldy. Sol sebepten, kólik júrgizýshilerine, ata-analar men jasóspirimderge qaýipsizdikti saqtaý qajettigin eskertemiz», - dep habarlady departamenttiń baspasóz qyzmeti. 

Qaýipsizdik máselesine jasóspirimder de alańdaýshylyq bildirip otyr. Bul oraıda Á.Kekilbaev atyndaǵy №41 mektep-gımnazııasynyń 9-synyp oqýshysy Sherimbet Arystannyń aıtary bar.

«Jaıaý júrginshiler jolaǵynan óter kezde aldymen baǵdarshamnyń jasyl túsi janǵanyna, kóliktiń toqtaǵanyna nazar aýdarý kerek. Kóshede qulaqqapty paıdalanbaǵan jón. Óıtkeni, qulaqqaptyń kesirinen kóligin dybysyn estilmeıdi. Al, kólik júrgizýshileri balalarǵa arnalǵan qaýipsizdik oryndyǵyn ornatyp, kishkentaı balalardy soǵan otyrǵyzǵanyn qalar edim», - deıdi Sherimbet Arystan. 

Polıtseılerdiń aıtýynsha, kólik júrgizýshileri jolda júrý erejesin qatań saqtaǵany jón. Al, ata-analar balalardy kóshege qaraýsyz jibermeýge tıis.

Eske sala ketelik, buǵan deıin Atyraý oblysynda Volvo-men soqtyǵysqan Mitsubishi Outlander órtenip, eki adam mert bolǵanyn habarlaǵan edik.