Atyraýda 1 keliden astam sıntetıkalyq esirtki satpaq bolǵan eki kúdikti ustaldy
Atyraý oblystyq polıtsııa departamentiniń baspasóz qyzmetinen málim etkendeı, kúdiktiler Taraz qalasynan kelgen.
«Esirtki qylmysyna qarsy is-qımyl basqarmasynyń qyzmetkerleri jedel-izdestirý is-sharasyn júrgizip, 1 keliden astam sıntetıkalyq esirtkini satpaq bolǵan 2 kúdiktini ustady. Tekserý kezinde 21 jáne 25 jastaǵy eki kúdiktiniń Taraz qalasynan Atyraýǵa esirtki satýǵa kelgeni anyqtaldy. Kúdiktilerdiń turǵyn jaıyn tintý kezinde 1 kelige jýyq sıntetıkalyq esirtki tárkilendi. Atyraý qalasynyń aýmaǵynda satý úshin jasyryn orynǵa tyqqan 300-den astam oramǵa oralǵan sıntetıkalyq esirtki tabyldy. Qazir kúdiktilerge qatysty esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý deregimen qylmystyq is qozǵaldy», -dep habarlady departamenttiń baspasóz qyzmeti.
Kúdiktiler ýaqytsha ustaý ızolıatoryna qamaýǵa alyndy.
Eske sala ketelik, buǵan deıin Atyraýda esirtki satqan 3 sheteldik 10 jylǵa sottalǵanyn jazǵan bolatynbyz.