Atyraý jylý júıeleri segiz aıdan beri kásipkerge 56 mln teńgeni tólemeı kelgen

<p>Atyraý jylý júıeleri kásiporny kásipkerge 56,1 mln teńgeni tólemeı kelgen. Kásipker atalǵan kásiporynǵa 8 aı buryn bekitý armatýrasyn jetkizip bergen, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Amaly taýsylǵan kásipker Sybaılas jemqorlyqqa qarsy is-qımyl agenttiginiń Atyraý oblystyq departamentine shaǵym túsirgen.

«Tekserý kezinde „Atyraý jylý júıeleri“ AQ bas tartýdy shart talaptarynda 360 banktik kún ishinde tólem jasaý kózdelgendigimen túsindirdi. Usynylǵan qujattardy zerdeleý barysynda osy kásiporynmen shart jasasqan barlyq kásipkerlik sýbektiniń qyzmetine qıyndyq týdyratyn ákimshilik kedergiler anyqtaldy. Máseleni sheshý úshin oblystyq Tabıǵı monopolııalardy retteý jáne Básekelestikti qorǵaý departamentterimen birlesip, sybaılas jemqorlyq táýekelderine jol bermeý, áleýetti ónim berýshiler tarapynan ótinishterdi azaıtý maqsatynda joǵary turǵan organdarǵa taýardy nemese kórsetiletin qyzmetterdi jetkizgeni úshin aqy tóleý sharttaryna naqty merzimderdi kórsetý túrinde ózgerister engizý týraly usynys joldandy. Budan basqa „Atameken“ UKP Atyraý oblystyq fılıaly, memlekettik jáne kvazımemlekettik organdar ókilderiniń qatysýymen ótken kezdesýde kásipkerge bereshekti tóleý týraly kelisimge qol jetkizildi. Qazir kásipkerge 30 mln teńge somasynda qaryz tólendi. Qaryzdyń qalǵan bóligi aı saıyn 10 mln teńgeden aýdarylady», -dep habarlady departamenttiń baspasóz qyzmeti.

Eske sala ketelik, buǵan deıin Atyraý oblysynda kásipkerler qandaı kedergige jıi tap bolǵanyn habarlaǵan edik.