Atyraý volonterleri abattandyrý jobasynan 14 mln teńgeniń buzýshylyǵyn anyqtady
Sybaılas jemqorlyqqa qarsy is-qımyl agenttigi Atyraý oblystyq departamenti baspasóz qyzmetiniń málimetinshe, volonterler munaıly shahardyń Balyqshy shaǵyn aýdanynda anyqtalǵan kemshilikke baılanysty ýákiletti memlekettik organdarǵa eOtinish servısi arqyly hat joldaǵan. Sondaı-aq, jergilikti Antıkorǵa aqparat berilgen.
– Volonterler «100 alańdy abattandyrý» jobasy aıasynda fýtbol jáne balalar alańdaryna júrgizilgen monıtorıng kezinde 14 mln teńgeden astam qarjy buzýshylyqtaryn anyqtady. Máselen, A.Qunanbaev, Áshenov kóshelerinde jaryq joq. Al, symdar ashyq kúıde qalǵan. Turǵyn úı alabyndaǵy aýlada tastar shashylyp jatyr. Balalardyń oıyn, fýtbol alańdary aıaqtalmaǵan. Memlekettik organdardan suratylǵan qujattarda eriktiler kórsetken jetispeýshilikter oryndalǵan jumystardyń qol qoıylǵan aktilerinde bar ekeni anyqtaldy. Atap aıtqanda, 16 metall jaryqtandyrý tiregi, 19 kósheniń shamdary, múgedekterge arnalǵan turaq belgileri, bir jaqty sharshy jol belgileri, jol belgilerine arnalǵan dóńgelek metall tirekter, sondaı-aq, rezeńke úgindilerden jasalǵan oram jabyny bar dep kórsetilgen. Abattandyrýǵa qatysty qurylys-montajdaý jumystary úshin «Rıgolıt» JShS-men 500 mln teńgeniń kelisimsharty jasaqtalǵan. Jumystyń aıaqtalý merzimi – 2023 jyldyń qarasha aıy, - dep habarlady departamenttiń baspasóz qyzmeti.
Eriktilerdiń úılesimdi jumysynyń nátıjesinde anyqtalǵan buzýshylyqtar joıyldy. Kóshelerge jaryqtandyrý júrgizildi. Jol belgileri ornatyldy, rezeńke úgindilerden jasalǵan oram jabyny jaıyldy.
Eske sala ketelik, budan buryn Atyraý oblysynda aýdandyq ákimdik kóshetti úsh ese qymbatqa satyp almaq bolǵanyn jazǵan edik.