Dekanǵa 6 jyl zańsyz jalaqy jazǵan: Atyraýda JOO-nyń kadr basshysy qyzmetinen ketti
Oqý ornynyń baspasóz qyzmeti osyǵan qatysty málimetti usyndy.
«Eńbek tártibin buzǵan 3 qyzmetkerge zańnama talaptaryna saı tártiptik sharalar qoldanyldy. Sonymen qatar, kadr qyzmetiniń basshysy jumysynan bosatyldy. Eńbek Kodeksiniń jáne oqý ornynyń ishki tártiptik erejesine sáıkes qyzmettik tártipti buzǵany úshin burynǵy dekan 1 qarashadan bastap jumystan shyǵaryldy. Burynǵy dekan 2017 jyldan bastap sozylmaly qaterli syrqatqa shaldyqqany, sol sebepten, densaýlyǵyna baılanysty medıtsınalyq tekserýden ótken. Dárigerlerden medıtsınalyq keńes alyp, emdelip júrgeni de anyqtaldy», -dep habarlady ýnıversıtettiń baspasóz qyzmeti.
Eske sala ketelik, buǵan deıin H.Dosmuhamedov atyndaǵy Atyraý ýnıversıtetiniń dekany 6 jyldan beri zańsyz jalaqy alyp kelgenin jazǵan edik.
«Ádildik joly» respýblıkalyq qoǵamdyq birlestigi óńirlik fılıalynyń málimetinshe, H.Dosmuhamedov atyndaǵy Atyraý ýnıversıteti ekonomıka jáne quqyq fakýltetiniń dekanyna jalaqyny zańsyz aýdarý faktisi anyqtalǵan. 2017 jyldan 2023 jyldyń qyrkúıegine deıin atalǵan dekan Ońtústik Koreıa, Túrkııa jáne taǵy basqa elderge birneshe ret barǵan. Alaıda, tabelderge jumys kúnderi retinde qoıylyp, jalpy somasy 1 mln teńgege jýyq tólem júrgizilgen. Kórsetilgen kezeńde dekanǵa 80 jumys kúni ishinde tabelderge aqyly kúnder qoıyldy. Al is júzinde ol jumys ornynda bolmaǵan.