Atyraý turǵyny kóliginiń áınegine Eldos Smetovtiń sýretin saldy
Atyraý qalasynyń kóshesinde artqy áınegine Parıjdegi Olımpıada oıyndarynyń chempıony atanǵan Eldos Smetovtiń portreti salynǵan jeńil kólik júr. Kólik ıesi – Aslan Jazyqov.
«Qazir jahan jurtynyń nazary Parıjdegi Olımpıada oıyndaryna aýyp otyr. Elimizdiń sportshylary Tokıoda altyn júlde almaǵannan keıin osy Olımpıadadan úmit kúttik. Olımpıadanyń alǵashqy kúni sol úmitimizdi sańlaq dzıýdoshy Eldos Smetov aqtady. Qarsylasynyń bárin jeńip, qazaq dzıýdoshylarynyń arasynan tuńǵysh chempıon atandy. Eldos eldiń mereıin ósirdi. Kók baıraǵymyzdy jelbiretip, Ánuranymyzdy shyrqatty. Osy sátti teledıdardan kórip, qýanyshtan qatty tolqydym», - deıdi Aslan Jazyqov.
Ol Olımpıada chempıonynyń sýretin kóliginiń áınegine salý úshin sirińkeniń taly men maqta taıaqshasyn qoldanǵan.
«Kóligimniń áınegi shań edi. Sony utymdy paıdalanýdy oılap, Eldostyń portretin sala bastadym. Chempıonnyń sýreti sátti shyqty. Muny kórgen júrgizýshiler de, jaıaý júrginshiler de kóligimdi fotoǵa túsirip aldy», - deıdi Aslan Jazyqov.
Onyń mamandyǵy sýretshi emes. Baǵdarlamashy mamandyǵyn meńgergen ol bala kezinen sýret salýdy unatady.
«Eldostyń portreti – alǵashqy týyndym emes. Buryn Gennadıı Golovkın men Sáken Bıbosynovtyń, Shafhat Rahmonovtyń portretin salǵan edim. Al, eń alǵash ret 2016 jyly «VAZ – 2109» kóliginiń artqy áınegine Anglııa chempıony atanǵan «Lester sıtı» fýtbol komandasynyń emblemasyn beıneledim. Bul sýretimdi BBC saıtynda «Qazaqstandyq jankúıerdiń týyndysy, biraq avtory belgisiz» dep jarııalandy», - deıdi Aslan Jazyqov.
Áýesqoı sýretshiniń úsh balasy bar. Onyń 9 jasar qyzy Darııa dzıýdo sektsııasyna qatysady.
Eske sala ketelik, budan buryn qazaqstandyq sheberdiń Olımpıada chempıony Smetovtiń sýretin qaǵazdan qıyp salǵany týraly jazǵan edik.