Atyraý turǵyndary Jaıyq ózenindegi juqa muz ústinen balyq aýlap júr

<p>Atyraýda kún jylynyp, Jaıyq ózenindegi muzdyń keıbir tusy erip ketken. Alaıda, tótenshe jaǵdaılar salasynyń eskertýin elemeı, balyq aýlaýshylar qatary kóbeıdi, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, Jaıyq ózenindegi muz juqarǵan.

Alaıda, muz ústine balyq aýlaýǵa shyǵatyn balyq aýlaýshylar sany azaımaı tur.

«Aýa raıynyń jyly bolýyna oraı Jaıyq ózeniniń keıbir tusynda muz erip ketti. Qazir ózendegi muzdyń qalyńdyǵy ortasha – 6-7 sm. Al, jaǵalaýdaǵy muz 2-3 sm-ge deıin juqarǵan. Sol sebepten, Atyraý oblystyq tótenshe jaǵdaılar departamentiniń qutqarýshylary kún saıyn balyq aýlaýshylarǵa, turǵyndarǵa qaýipsizdik talaptaryn saqtaýǵa baılanysty túsindirý jumysyn júrgizýdi qolǵa aldy», -dep habarlady departamenttiń qoǵammen baılanys toby.

Osyǵan baılanysty tótenshelikter áýesqoı balyqshylar men turǵyndarǵa juqa muz ústine shyǵyp, oqys oqıǵaǵa urynyp qalmaý qajettigin eskertti.

«Alaıda, Jaıyq ózeninen balyq aýlaýshylar qutqarýshylardyń eskertýin eskere bermeıdi. Mundaı nemquraılyq ókinishke uryndyrýy múmkin. Sol sebepten, oqys oqıǵanyń aldyn alý úshin muzdaǵy qaýipsizdik erejelerin qatań saqtaǵan jón», -dep eskertý jasady departamenttiń baılanys tobynan.

Eske sala ketelik, buǵan deıin polıtseıler ózenniń muzy oıylǵanda sýǵa túsip ketken eki adamdy qutqaryp qalǵanyn jazǵan bolatynbyz.

Al, búgin túnde atyraýlyq polıtseıler jasóspirim qyzdy qutqardy.