Atyraý turǵyndary tasqyn sýǵa qarsy bóget turǵyzýǵa judyryqtaı jumyldy
Máselen, Jylyoı aýdanynan 31 myńnan astam turǵyn qaýipsiz aımaqqa evakýatsııalandy. Olardyń denin Qulsary qalasynyń turǵyndary quraıdy. Qazir monoqalada er-azamattar ǵana qalǵan. Kúni-túni migir tappaı, tipti kóz ilmeı júrgen olardyń maqsaty – kindik qany tamǵan, otbasynyń shýaqty shyraǵy jaǵylǵan turǵyn úıin tasqyn sýdan saqtap qalý.
Monoqala degen ataýy bolǵanymen, Qulsary birneshe shaǵyn aýdanǵa, tipti aýylǵa bólingen. Ár aýyldyń jigitteri qıyn sátte judyryqtaı jumylyp, jańadan bóget soǵyp, burynǵysyn nyǵaıtýdy qolǵa alǵan. Jigitterdiń aýyzbirshiligi – kópke úlgi bolarlyq ónege.
Qazir Qulsary qalasynda 5 myńǵa jýyq erikti bóget nyǵaıtýǵa atsalysyp júr. Sonyń biri Beıbarys Bekeshov 7-shi aýylda turady. Bes kúnnen beri úıine barmaı, dostarymen birge bes shaqyrym aýmaqqa jeti qabaty bar bóget turǵyzǵan.
«Biz úshin Qulsarydan ystyq, Qulsarydan qymbat meken joq. Munda qyzyqqa toly balalyq shaǵymyz ótti. Osynda ómirge keldim, osynda eseıgendikten Qulsaryny qalaı qorǵamaımyn? Otanǵa degen súıispenshilik týǵan jerińdi qorǵaýdan bastalady», - deıdi Beıbarys Bekeshov.
Qulsaryǵa Atyraý garnızonynyń №41433, 41321 jáne 21642 áskerı bóliminiń áskerı qyzmetshileri kómekke keldi. Máselen, №41433 áskerı bóliminiń rota komandıri, kapıtan Ramazan Odınaevtyń aıtýynsha, jeke quram tasqyn sý basqan «Dossor-Quslary» baǵytyndaǵy joldy aınalyp ótken. Bul úshin 200 shaqyrymdy jaıaý júrýge májbúr bolǵan.
«Áskerı qyzmetshiler Qulsary qalasyn tasqyn sýdan qorǵaý úshin jaǵalaýdy nyǵaıtý jumystaryna kiristi. Olar tańǵy saǵat 06:00-07:00-ge deıin 1 myńnan astam qapqa topyraq toltyryp, bógetke tósedi. Jylyoı aýdanyndaǵy bul jumysqa 200-den astam áskerı qyzmetshi jumyldyryldy» deıdi rota komandıri Ramazan Odınaev.
Tasqyn sýǵa qarsy bógetti nyǵaıtý Inder, Mahambet aýdandarynda júrip jatyr. Bul jumysqa eńkeıgen káriden mekteptegi balaǵa deıin qol ushyn sozyp júr. Solardyń qatarynda Mahambet aýdanyndaǵy Beıbarys aýylynda turatyn Orynsha Qojıeva da bar. Kópti kórgen ájeniń jasy – 92-de. On balasynan 16 nemere men 10 shóbere súıgen. Bastapqyda «Pervomaıskıı» JShS-da, keıin mektepte jumys istep, zeınetkerlikke shyqqan.
Kópti kórgen áje Jaıyq ózenimen tasqyn sý keledi degendi estip, úıinde otyra almapty. Belin shart túıip, jaǵalaýdaǵy bógetti nyǵaıtyp jatqan aýyldastaryna kómekke umtyldy.
«Biraz jasqa keldim. Sonda da úıde otyra almadym. Qazir meniń qolymnan qum toltyrylatyn qapty daıyndap otyrý ǵana keledi. Tabıǵattyń tosyn minezin boljaý múmkin emes. Osy jasyma deıin mundaı qıyndyqtyń talaıyn kórdik. Sý tasqyny sekildi tabıǵı apatqa aldyn ala daıyndalý kerek», - deıdi Orynsha Qojıeva.
Jasy ulǵaısa da aýyldastarynan qalmaı, tasqynǵa qarsy kúreske kirisken ájeniń bul isi týraly áleýmettik jelide vıdeo tarady. Sol vıdeodan kórgen bolýy kerek, Prezıdent alǵysyn joldady. Ony ájege oblys ákimi jetkizdi.
Atyraý oblysyna ár óńirden kómekke jedel jetken qutqarýshylar, eriktiler kóp. Máselen, Almaty oblysynan 115 adam, Aqtóbe óńirinen 20 áskerı keldi. Al Mańǵystaý oblystyq tótenshe jaǵdaılar departamentiniń ókili Ǵabıt Omarovtyń málimetinshe, kórshi óńirden 72 qutqarýshy kelgen.
«Bizdiń departamenttiń 27 qyzmetkeri Bereke aýylynda bir kúnde 3 myń qapqa qum toltyryp, 2,5 shaqyrym bóget soqtyq. Bes qaıyq, jeti arnaıy tehnıkamyz bar. Ózge qyzmetkerler sý basqan eldi mekenderdiń turǵyndaryn qaıyqpen tasymaldaý jumysyna jumyldyryldy», - dedi azamattyq qorǵaý podpolkovnıgi Ǵabıt Omarov.
Bereke aýylynyń turǵyny Azat Baıanovtyń deregine súıensek, munda uzyndyǵy 3 shaqyrym, bıiktigi 3 metr bóget salynyp jatyr. Jergilikti kompanııalar men mańǵystaýlyq kúsh qurylymdary jumylyp, turǵyndarmen birlese jumys atqaryp júr.
«Biz aýylymyzdy tasqyn sýdan qorǵap qalýǵa jumystanýdamyz. Bastapqyda bógettiń bıiktigi alasa boldy. Turǵyndardyń atsalysýymen ákimdik, jergilikti mekemeler men mańǵystaýlyq kúsh qurylymdarynyń jumylýymen bógetti bıiktettik. Janar-jaǵarmaı, qajetti qural-jabdyqtar pen tehnıka jetkilikti. Jaıyq ózenine kelgen sýdyń deńgeıi qalypqa túskenshe, aýyldy qorǵaýdy jalǵastyra beremiz», - dedi Azat Baıanov.
Al Atyraý qalasynda Jaıyq ózeniniń jaǵalaýyna bóget salynýy tıis 105 ýchaske belgilengen. Oblystyq ishki saıasat basqarmasynyń mamany Aqbóbek Táttibekqyzynyń aıtýynsha, qazir 5 myńǵa jýyq volonter jaǵany bekitý jumysyn atqaryp júr.
«Atyraý qalasynyń aýmaǵynda sý basý qaýipi bar dep tanylǵan shaǵyn aýdandar, shahar mańyndaǵy eldi mekender terrıtorııasyna jaýaptylar bekitildi. Kásiporyndar, jergilikti atqarýshy bılik organdarmen birge volonterler Jaıyq ózeniniń jaǵalaýyndaǵy bógetti nyǵaıtý úshin qapty topyraqpen toltyryp beredi. Olar bul jumysty kúni-túni úzilissiz atqarady», - deıdi Aqbóbek Táttibekqyzy.
Eske sala ketelik, budan buryn Atyraý oblysynda tótenshe jaǵdaı jarııalanǵanyn jazǵan edik.
Sondaı-aq, Serik Shápkenov Jaıyq ózeniniń sýy Atyraý qalasyna qaı tustan kirýi múmkin aıtqan edi.