Atyraý soty alaıaqtarǵa aldanǵan 220 úleskerdiń talabyn qanaǵattandyrdy
Joǵarǵy sottyń málimetinshe, turǵyn úı-qurylys kooperatıvi 2020-2021 jyldary Atyraýda «Aqmarjan» jáne «Jibek Joly» turǵyn úı keshenderin salý úshin 220 adamdy úlesker retinde tartqan. Sóıtip, úleskerler 2 mlrd teńge qarjy salyp, turǵyn úı kesheniniń qurylysyna qatysý sharttaryn jasasqan.
«Sharttarda qurylysty aıaqtaý, turǵyn úı keshenin paıdalanýǵa berý merzimi 2021 jyldyń qazan jáne jeltoqsan aıy dep kórsetilgen. Alaıda, jaýapkerler atalǵan merzimde qurylysty aıaqtamaǵan. Qozǵalǵan qylmystyq is aıasynda sol páterler túrli adamdarǵa birneshe ret satylǵany belgili bolǵan. 2023 jyly turǵyn úı-qurylys kooperatıviniń quryltaıshylary alaıaqtyq áreketteri jáne aldaý nemese senimdi teris paıdalaný jolymen múliktik zalal keltirgeni úshin (Qylmystyq kodekstiń 190-babynyń 4-bóliginiń 2-tarmaǵy, 195-babynyń 4-bóliginiń 2-tarmaǵy) 6 jylǵa bas bostandyǵynan aıyryldy», - dep habarlady Joǵarǵy sottyń baspasóz qyzmeti.
Alaıaqtarǵa aldanǵan 220 úlesker Atyraý qalalyq sotyna talap aryzben júgindi. Talap aryzda eki turǵyn úı-qurylysy kooperatıvine jáne olardyń quryltaıshylaryna olarmen jasalǵan sharttardy buzý, aıaqtalmaǵan qurylys obektilerinen óndirip alynǵan aqshalaı qarajatty ózderi qurǵan turǵyn úı-qurylys kooperatıvi 3-ke berýdi suraǵan.
«Úleskerler talap aryzda jaýapkerlerdiń sharttardyń talaptaryn buzǵanyn, tólemdi alǵannan keıin úılerdiń qurylysyn aıaqtamaǵanyn, talap qoıýshylarǵa páterlerdi bermegenin atap kórsetti. Atyraý qalalyq soty 220 talap qoıýshynyń talaptaryn negizdi dep eseptep, tolyq kólemde qanaǵattandyrdy», - dep málim etti Joǵarǵy sottan.
Sot sheshimi zańdy kúshine engen joq.
Eske sala ketelik, buǵan deıin atyraýlyqtar 3 jylda úı qurylysyna 5 mlrd teńgege jýyq aqsha salyp, aldanyp qalǵanyn jazǵan edik.