Atyraý polıtsııasy azamattyq nekedegi áıelin óltirýge oqtalǵan er adamdy izdep jatyr

<p>ATYRAÝ. KAZINFORM — Atyraýda er adam azamattyq nekedegi burynǵy áıelin óltirýge oqtalǵan. Qazir polıtsııa qyzmetkerleri kúdiktini izdep jatyr.</p>

Bul derekti oblystyq polıtsııa departamentiniń baspasóz qyzmeti rastady.

Oqıǵa 9 maýsymda bolǵan. Kúdiktiniń qylmystyq áreketi vıdeokameraǵa túsip qalǵan.

«Atyraý qalasyndaǵy kópqabatty úıdiń biriniń dálizinde er adam 33 jastaǵy áıeldi óltirýge oqtalǵan. Qazir 29 jastaǵy kúdiktige qatysty qylmystyq is tirkelip, tergeý bastaldy. Kúdiktiniń jeke basy anyqtalyp, ony ustaýǵa baǵyttalǵan keshendi jedel-izdestirý is-sharasy júrgizilip jatyr. Sot-medıtsınalyq saraptamasy taǵaıyndaldy», -dep habarlady Atyraý qalasyndaǵy № 1 polıtsııa bóliminiń bastyǵy Rýslan Baıtenov. 

Onyń aqparatyna qaraǵanda, kúdikti men jábirlenýshi buryn azamattyq nekede bolyp, birge turǵan.

Ózge aqparat tergeý múddesine sáıkes jarııalaýǵa jatpaıdy.

Qazir jábirlenýshi aýrýhanada jatyr. 

Eske sala ketelik, buǵan deıin Atyraýda janjal kezindegi kisi ólimine qatysy bar kúdikti qamaýǵa alynǵanyn habarlaǵan bolatynbyz.