Atyraý polıtseıleri turǵyndary evakýatsııalanǵan Taldykól aýylyn táýlik boıy baqylaýǵa aldy
Mahambet aýdandyq jergilikti polıtsııa qyzmetiniń ýchaskelik ınspektory, polıtsııa maıory Esbolat Jeksenǵulovtyń aıtýynsha, patrýldik baqylaý eki aýysymmen táýlik boıy júrgiziledi.
«Beıbarys aýyldyq okrýgine qarasty Taldykól eldi mekeniniń turǵyndaryn aldyn ala evakýatsııalaý jarııalanǵaly beri jergilikti polıtsııa qyzmetkerleri táýlik boıy qoǵamdyq tártipti baqylaýdy qolǵa aldy. Maqsatymyz – qoǵamdyq tártipti qadaǵalaý jáne qaraýsyz qalǵan úılerdi tonaý faktisiniń aldyn alý. Sol sebepten, Mahambet aýdany jergilikti polıtsııa qyzmetinen 30 polıtsııa, 7 avtokólik bólindi», - dedi Esbolat Jeksenǵulov.
Atyraý oblystyq jedel shtabtyń málimetinshe, Mahambet aýdanyndaǵy Taldykól aýylyna kiretin joldy tasqyn sý shaıý qaýpi kúsheıgen. Soǵan baılanysty Mahambet aýdandyq jedel shtabtyń sheshimimen 13 mamyrda turǵyndardy aldyn ala evakýatsııalaý bastalǵan.
Bul eldi mekende 506 turǵyn úı bar. Aýylda 1215 turǵyn tirkelgen.
«Turǵyndardy ýaqytsha qonystandyrý úshin Atyraý qalasyndaǵy APEC joǵary kolledjinde jáne «Dana» qonaq úıinde evakýatsııalyq pýnktter daıyndaldy. Birinshi kezekte júkti áıelder, balalar men zeınet jasyndaǵy qarııalar kóshiriledi. Al aýyr naýqastar oblystyq Densaýlyq saqtaý basqarmasy ázirlegen algorıtm boıynsha evakýatsııalanady», - dep habarlaǵan edi aýdan ákimi Qaırat Nurlybaev.
Eske sala ketelik, budan buryn Atyraý oblysyndaǵy Taldykól aýylynyń turǵyndaryn evakýatsııalaý bastalǵanyn jazǵan bolatynbyz.