Atyraý-Oral trassasynan Inderbor kentine baratyn jol ashyldy

<p>ATYRAÝ. KAZINFORM — Atyraý-Oral trassasynan Inder aýdanynyń ortalyǵy — Inderbor kentine deıin baratyn joldy jóndeý aıaqtaldy. Endi bul jolmen tek jeńil kólikterdiń júrýine ruqsat berildi.</p>

Inder aýdany ákiminiń orynbasary Artýr Mýrzınniń aıtýynsha, atalǵan joldyń 100 metr bóligin tasqyn sý basqan. 

«Atyraý-Oral trassasynan Inderbor kentine burylatyn 7 shaqyrym joldy qalpyna keltirý 14 mamyrda bastaldy. Joldyń eki jıegine topyraq toltyrylǵan 1 tonnalyq qaptar tóseldi. Tasqyn sýdyń toqtaýsyz aǵýy úshin 720 mıllımetrlik 3 temir turba salyndy. Topyraq pen gıps tastar tógildi. Joldy jóndeýge 3 júk tıegish, 1 gıdromek, 1 ekskavator, 7 KamAZ kóligi tartyldy», — dedi Artýr Mýrzın.

Foto: Atyraý oblysynyń jedel shtaby

Jóndeý júrgizilgen 7 shaqyrymdyq jol 16 mamyr kúni keshki saǵat 21:00–de ashyldy.

Biraq, bul jolmen aýyr júk kólikteriniń júrýine tyıym salynǵan. 

Eske sala ketelik, buǵan deıin Atyraý-Oral trassasynan Inderborǵa baratyn joldy jóndeý aıaqtalýǵa jaqyn ekenin jazǵan edik.