Atyraý oqýshylary kólik júrgizýshilerine jol erejesin saqtaý týraly hat joldady
Atyraý qalalyq polıtsııa basqarmasy patrýldik polıtsııa batalony komandıriniń orynbasary Ersin Qojahmetovtiń aıtýynsha, «Qaýipsiz jol júrisi» aptalyǵy ótip jatyr.
Patrýldik polıtsııa batalonynyń qyzmetkerleri aptalyq aıasynda «Júrgizýshige hat» taqyrybynda mektep oqýshylaryna túsindirý jumystaryn júrgizdi. Al oqýshylar jyldamdyqty asyryp, jol belgilerine nazar aýdarmaıtyn, mas kúıde rýlge otyryp, jol apatyna sebepshi bolatyn júrgizýshilerge arnaıy hat joldady.
«Qymbatty júrgizýshi aǵaı, qoǵamdyq kóliktiń qyzmetin kúndelikti paıdalanamyz. Onymen jumysqa, sabaqqa baramyz, úıge qaıtamyz. Kólikti abaılap júrgizseńiz, barlyǵymyz aman bolamyz. Apattan saq bolý – óz qolyńyzda! Saparyńyz sátti bolǵaı», - dep jazǵan oqýshynyń biri.
Atyraý qalalyq polıtsııa basqarmasy patrýldik polıtsııa batalony komandıriniń orynbasary Ersin Qojahmetovtiń pikirinshe, oqýshylardyń haty jol erejelerin saqtamaıtyn júrgizýshilerge oı salýy múmkin.
«Jol erejesin buzǵan júrgizýshilerge aıyppul salynsa da, jol apaty azaıar emes. Sondyqtan júrgizýshige talap-tilegin jetkizgen oqýshylardyń pikiri arqyly zań buzýshylyqtardyń aldyn alýdy kózdedik. Aktsııa barysynda oqýshylar jazǵan hattar júrgizýshilerge kórsetildi», - deıdi Ersin Qojahmetov.
Eske sala ketelik, budan buryn Atyraýda kólik qaqqan 6 jasar jasóspirimge ota jasalǵanyn habarlaǵan edik. Keıin Atyraýda jeńil kólik aýdarylyp, 21 jastaǵy jolaýshy kóz jumǵanyn jazǵan bolatynbyz.