Atyraý oblysynyń turaqtandyrý qoryna 5,6 myń tonna kókónis jetkizilgen
«Atyraý» áleýmettik-kásipkerlik korporatsııasy» AQ azyq-túlik qaýipsizdigi departamentiniń dırektory Qaısar Qurmanalıevtiń aıtýynsha, áleýmettik mańyzy bar 18 taýardyń tizimi jasaqtalǵan.
— Óńir turǵyndaryn pııaz, qyryqqabat, sábiz jáne kartoppen qamtamasyz etýdiń qamy jasaldy. Turaqtandyrý qoryna Mahambet aýdanyndaǵy egis alqaptarynan 5 myń 667 tonna kókónis jetkizildi. Bul ónimder Atyraý qalasyndaǵy 3 bazarda, 6 saýda pavılonynda, «Lıder», «Ideal» sýpermarketteriniń 32 saýda núktesinde naryqtaǵy qunynan 20 paıyzǵa tómen baǵamen satylady. Qazir qoımadaǵy kókónister tazalanyp, suryptalyp, saýda oryndaryna jiberilip jatyr, — dep habarlady Qaısar Qurmanalıev.
Onyń málimetinshe, 14 áleýmetik mańyzy bar ónim 49 saýda núktesinde arzan baǵamen usynylyp otyr. Atalǵan qordan 2024-2025 jyldary baǵany turaqtandyrý úshin jergilikti saýda jelileri men taýar óndirýshilerge aınalym qarjysyn tolyqtyrý maqsatynda qaıtarymdy qaryz berilgen.
Eske sala keteıik, osyǵan deıin Atyraýdaǵy sibir jarasynan keıin bazardaǵy et pavılony birneshe kúnge jabylǵanyn jazǵan bolatynbyz.