Atyraý oblysynyń Mahambet aýdanynda Jaıyq deńgeıi 795 santımetrge jetti

<p>ATYRAÝ. KAZINFORM &ndash; Atyraý oblysynda Jaıyq ózeniniń sýy kún saıyn kóterilip jatyr. Búgin Mahambet aýdanynda ózen deńgeıi 795 santımetrdi kórsetti.&nbsp;</p>

Atyraý oblysynyń jedel shtaby «Qazgıdromet» RMK óńirlik fılıalynyń gıdrologııalyq monıtorıng deregin usyndy. 

«Jaıyq ózenine kórshiles Batys Qazaqstan oblysynyń aýmaǵynan sý kelip jatyr. Búgin, 2 mamyrda tańerteńgi saǵat 08:00-de Inderbor kentindegi gıdrobekette sý deńgeıi +32 santımetrge kóbeıip, 750 santımetr boldy. Bul aýdanda Jaıyq ózeni sý tasqyny bastalǵannan beri 527 santımetrge kóterildi», - dep habarlady oblystyq jedel shtab. 

Al, Mahambet aýdanynda bir táýlikte ózen arnasy +16 santımetrge ulǵaıǵan. 

«Qazir Mahambet aýylynyń tusynda Jaıyq ózeniniń deńgeıi 795 santımetrdi qurdy. Sý tasqyny bastalǵan kezden bergi kóterilý kórsetkishi – 478 santımetr», - dep málim etti oblystyq jedel shtabtan. 

Sý aıdyny deńgeıiniń kóterilgeni Atyraý qalasyndaǵy gıdrobekette de tirkelip otyr. Mundaǵy sý deńgeıi +8 santımetrge kóterilip otyr. Qazir shahar mańynda Jaıyq deńgeıi 459 santımetrge jetken. 

«Inder jáne Mahambet aýdanynda Jaıyq ózeniniń qaýipti deńgeıi – 850 santımetr. Al, Atyraý qalasynda 550 santımetr qaýipti deńgeı sanalady», - delingen oblystyq jedel shtab aqparatynda. 

Eske sala ketelik, budan buryn Jaıyq ózeniniń deńgeıi Inderde – 707, Mahambet aýdanynda 770 santımetrge jetkenin jazǵan bolatynbyz.