Atyraý oblysynyń fermerleri nesıege tórt túlik berý jobasyn qoldady

<p>ATYRAÝ. KAZINFORM &ndash; Atyraý oblysynyń fermerleri taýarly nesıe berý baǵdarlamasyna qoldaý bildirdi. Endi olar nesıege &nbsp;990 bas mal berýdi kózdep otyr.&nbsp;</p>

Premer-Mınıstrdiń keńesshisi Eraly Toǵjanovtyń aıtýynsha, taýarlyq nesıeniń maqsaty – aýyl turǵyndarynyń ál-aýqatyn kóterý. Jańa joba kredıttik jaǵdaıy qıyn jáne kepilge qoıatyn múlki joq adamdarǵa arnalǵan. Olar kepilsiz, paıyzsyz taýarly nesıe alyp, tórt-túlikti kóbeıte alady.

«Biz aýyl kásipkerlerimen keńesip, taýarly nesıe jobasyn oılastyrdyq. Bul bastamany qoldaǵan fermerler az qamtylǵan otbasylarǵa 8 880 mal taratty. Jobaǵa sáıkes, 5 jylǵa nesıege 10 sıyr beriledi. Ony qaıtarý shartyna boıynsha birinshi jyly – demalys. Nesıege mal alǵan adam ekinshi jyly 4, úshinshi jyly taǵy 4 sıyrdy qaıtarýy tıis. Bizdiń esebimizshe, 4-shi jyly mal sany tólimen 16-ǵa jetýi kerek. Al, 7 jylda múıizdi iri qarany 24-ke deıin kóbeıtýge bolady», - dedi Eraly Toǵjanov.

Jergilikti fermerler ákimdiktiń bul usynysyna qoldaý bildirip otyr. Olar atalǵan baǵdarlamamen taýarly nesıe berýge daıyn. 

«Aýyl turǵyndaryn kásipkerlikke yntalandyrý maqsatynda qolǵa alynǵan taýarlyq nesıeni qoldaımyz. Ózim jetekshilik etetin Jylyoı aýdanyndaǵy sharýa qojalyǵynan 300 qoı, 100 jylqy, 50 sıyr jáne 30 túıeni nesıege beremin. Osy arqyly taýar alýshynyń da, bizdiń de tórt túligimiz kóbeıedi», - dedi «Dostan Ata» sharýa qojalyǵynyń jetekshisi Seıtjan Baljigitov. 

Al Qyzylqoǵa aýdanyndaǵy «Qurman» sharýa qojalyǵynyń jetekshisi Qurman Jańabaev 100 qoı, 50 jylqy jáne 30 sıyr usynyp otyr. Jylyoı aýdanynda tirkelgen «Aşysaı» sharýa qojalyǵynyń jetekshisi Baqtyǵalı Jıenqulov 300 qoı-eshki men 30 jylqyny nesıege bergisi keledi. 

Aqtóbe oblysynyń fermerleri ataǵan baǵdarlamamen jumys isteý tájirıbıesimen bólisti. 

«Biz nesıege mal berýdi biz erte bastadyq. Aqtóbedegi iri sharýashylyǵy bar kooperatıvter maldy jumyssyzdar men ataýly áleýmettik kómek alýshylarǵa berip keledi. Men taýarly nesıege 4 myń qoı men 120 sıyr berdim. Qazir nesıege berilgen maldyń 40 paıyzyn qaıtaryp aldym. Bul jobanyń eki jaqqa da tıimdiligi bar. Jalpy «Aýyl amanaty» baǵdarlamasymen beriletin nesıe aýyl sharýashylyǵyn damytýǵa kóp múmkindik beredi. Biz baǵdarlamanyń jemisin kórip otyrmyz», - dedi Aqtóbe oblysynyń kásipkeri Kámshat Tóleýova.

Eske sala ketelik, buǵan deıin Atyraýdaǵy tasqynnan zardap shekken Qyzylqoǵa sharýalaryna 62 mln teńge ótemaqy taǵaıyndalǵanyn jazǵan edik.