Atyraý oblysynyń eki turǵynynan zańsyz aýlanǵan bekire men ańshy qarýy tabyldy

<p>Atyraý oblysynda eki adamnan zańsyz aýlanǵan bekire men ańshylyq qarý tárkilendi. Kúdiktilerge qatysty sotqa deıingi tergeý júrip jatyr, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Atyraý oblystyq polıtsııa departamentiniń baspasóz qyzmetinen málim etkendeı, kúdiktiler Sharon ózeninde ustalǵan.

«Qazir sý aıdyndarynda «Bekire-2023» kúzgi is-sharasy ótkizilip jatyr. Balyq qorlaryna qylmystyq qol suǵýshylyqqa qarsy kúres bóliminiń qyzmetkerleri 21 qazanda Sharon ózeninde «Býdarka» qaıyǵyn toqtatty. Tekserý kezinde qaıyqtan 18,5 keli bekire tuqymdas, 8,5 keli kara balyq pen 2 ańshylyq qarý tabyldy. Qaıyqta Qurmanǵazy aýdanynyń 1965 jáne 1968 jylǵy turǵyndary bolǵan. Balyq túrleri men qarý tárkilendi», - dep habarlady departamenttiń baspasóz qyzmeti.

Polıtsııa qyzmetkerleri atalǵan derek boıynsha QR Qylmystyq kodeksiniń 335-babynyń 3-bóligimen (Balyq resýrstaryn, basqa da sý janýarlaryn nemese ósimdikterin zańsyz alý) sotqa deıingi tergep-tekserýdi bastady. Ózge aqparat Qylmystyq-protsestik kodeksiniń 201-babyna sáıkes jarııalaýǵa jatpaıdy.

«Qazaqstan Respýblıkasy Konstıtýtsııasynyń 77-baby 3-tarmaǵynyń 1-tarmaqshasy, Qylmystyq-protsestik kodeksiniń 19-baby 1-bóligine sáıkes adamnyń kináli ekendigi zandy kúshine engen sot úkimimen tanylǵansha ol jasalǵan qylmysqa kináli emes dep esepteledi», - dep málim etti departamenttiń baspasóz qyzmetinen.

Eske sala ketelik, buǵan deıin Atyraý turǵyny 96 keli bekire balyǵymen ustalǵanyn habarlaǵan edik.