Atyraý oblysyndaǵy «Teńiz» ken ornynda jóndeý jumysy aıaqtalǵan
Energetıka mınıstrliginiń málimetinshe, Jylyoı aýdanynda ornalasqan ken ornyndaǵy jóndeý jumysyn 15 qańtarda aıaqtaý josparlanǵan. Alaıda jóndeý belgilengen merziminen buryn sátti aıaqtalǵan.
– Qazir ken qoınaýyn paıdalanýshynyń málimetinshe, iske qosýǵa daıyndyq júrip jatyr, -delingen aqparatynda.
Al «Teńizshevroıl» JShS-niń baspasóz qyzmetinen málim etkendeı, ken ornyndaǵy nysandarǵa tehnıkalyq kútim júrgizilgen.
– Jóndeý jumysy qaýipsiz jáne senimdi óndiristik qyzmetti qamtamasyz etý úshin qolǵa alynǵan. Kompanııa nysandardaǵy jabdyqtarǵa qajetti tehnıkalyq kútim jumystaryn júrgizedi. Kaspıı qubyr konsortsıýmy jelisi arqyly munaı tasymaldaý úzdiksiz rejımde jalǵasyp jatyr, -dep habarlady kompanııanyń baspasóz qyzmeti.
Eske sala ketelik, byltyr «Teńiz» ken ornynda óndirilgen munaı men gaz kólemi azaıǵanyn habarlaǵan bolatynbyz.