Atyraý oblysyndaǵy kompanııalar 8 aıda 33,5 mln tonna munaı óndirdi

<p>ATYRAÝ. KAZINFORM &ndash; Atyraý oblysyndaǵy kompanııalar 8 aıda 33,5 mln tonna munaı óndirgen. Bul týraly óńir turǵyndarymen kezdesýde Energetıka mınıstriniń orynbasary Álibek Jamaýov málim etti.&nbsp;</p>

«Atyraý oblysy – elimizdiń munaı-gaz ónerkásibi salasynyń flagmany. Byltyr Atyraý oblysynda 52,5 mln tonna munaı óndirildi. Osy jyldyń 8 aıynda munaı óndirý kólemi 33,5 mln tonnany qurady», - dedi Álibek Jamaýov.

Mınıstr orynbasarynyń aıtýynsha, elimizdegi 3 ken ornynda iri jobalardy júzege asyrý jumystary jalǵasyp jatyr.

Birinshisi – Teńiz ken ornynda júzege asyrylyp jatqan keleshek keńeıtý jobasy. Bul joba munaı óndirýdi jylyna 12 mıllıon tonnaǵa arttyrýǵa múmkindik beredi.

Ekinshisi – Qarashyǵanaq ken ornyndaǵy kompressorlar qurylysy. Munda 4-shi jáne 5-shi gazdy qaıta aıdaý kompressory iske qosylyp, 6-shy kompressordyń qurylysy bastaldy. Bul jobalar ken ornynda óndirýdi jylyna 10-11 mln. tonna deńgeıinde ustap turýǵa baǵyttalǵan.

Al, úshinshi joba – Qashaǵan ken ornynan óndiriletin gazdy óńdeý zaýyty. Qazir jylyna qýaty 1 mlrd tekshe metr ilespe gazdy qaıta óńdeý boıynsha jobany iske asyrylyp jatyr.

Sondaı-aq, Qashaǵanda qýattylyǵy 2,5 mlrd tekshe metr gazdy óńdeıtin ekinshi zaýyttyń (2A fazasy) qurylysy bastaý kózdelgen. Qazir onyń jobasyn iske asyrý boıynsha jumystar qolǵa alynǵan.

«Munaı aınalymyn baqylaý maqsatynda munaı men gaz kondensatyn esepke alýdyń aqparattyq júıesi iske qosyldy. Bul munaı aınalymynyń 95 paıyzyn qadaǵalaýǵa múmkindik beredi. Elimizde munaı-hımııa jobalaryn júzege asyrý jalǵasyp jatyr. Ótken jyly qýaty jylyna 500 myń tonna polıpropılen óndiretin zaýyt iske qosyldy. Endi qýaty jylyna 380 myń tonna býtadıen jáne jylyna 1,250 mln tonna polıetılen óndiretin jobalar iske asyrý satysynda tur. Polıetılentereftalat, metanol, karbamıd óndirý boıynsha jobalardy iske asyrý baǵytyndaǵy jumystar júrgizilip jatyr. Munaı hımııasy ekonomıkanyń aralas salalarynda shaǵyn jáne orta bıznesti damytýǵa serpin beredi. Árbir keıingi qaıta bólýmen munaı-gaz-hımııa ónimderiniń quny artady. Al, 4-shi qaıta bólýden keıin ónimniń quny 10 esege ulǵaıady», - dep atap ótti Álibek Jamaýov.

Eske sala ketelik, budan buryn Qashaǵan gazyn óńdeıtin zaýyt 2026 jyly iske qosylatynyn jazǵan edik.