Atyraý oblysyndaǵy kanaldardan 45 mln-ǵa jýyq shabaq qutqarylǵan

<p>ATYRAÝ. KAZINFORM &ndash; Atyraý oblysyndaǵy kanaldardan balyq shabaqtaryn qutqarý jalǵasyp jatyr. Bir aptada Jaıyq ózenine 45 mln-ǵa jýyq shabaq jiberildi.</p>

Atyraý oblystyq Tabıǵı resýrstar jáne tabıǵat paıdalanýdy retteý basqarmasynyń basshysy Nurlan Jantoqovtyń aıtýynsha, bir aptadan beri shabaqtardy qutqarý jumysy jalǵasyp jatyr.

Shabaqtardy qutqarýǵa Jaıyq-Kaspıı oblysaralyq basseındik balyq sharýashylyǵy ınspektsııasynyń qyzmetkerleri men №5546 áskerı bóliminiń sarbazdary tartylǵan. Sondaı-aq, balyq sharýashylyǵy salasyndaǵy «Abylaı-Han», «Amankeldy atyndaǵy», «Dolgıı», «Vostok» JShS, «Tilekshi» seriktestikteri men «Saǵıeva» sharýa qojalyǵynyń qyzmetkerleri men «Aqjaıyq» memlekettik tabıǵı rezervatynyń mamandary kómekke kelgen.

«Qazir kóktemgi tasqyn kezinde jaıylmaǵa shyqqan sý tartylyp jatyr. Sonyń saldarynan balyq shabaqtarynyń qyrylý qaýpi týyndady. Sol sebepten shabaqtardy qutqarý qolǵa alyndy. Osyǵan baılanysty 17 is-shara jospary bekitildi. Shabaqtardy qutqarý 5 tamyzda bastalyp, 9 tamyzdan beri jumys kúshi kóbeıttildi. Oǵan 30-dan asa sarbaz men 20-dan asa balyq sharýashylyǵy kooperatıvi jumyldyryldy. Al Teplyı atalatyn kanal boıynda Ulttyq ulannyń 100-den sarbazy men balyq sharýashylyǵy salasyndaǵy 11 kooperatıv tartyldy. Osy kezge deıin 44 mln 741 shabaq qutqaryldy», - dedi Nurlan Jantoqov.

Onyń deregine qaraǵanda, Atyraýdan Dossor baǵytyna qatynaıtyn tas joly boıyndaǵy «Sokolok» arnasynan jáne sol aýmaqtaǵy jaıylmadaǵy sýdan 646 myń shabaq qutqarylǵan. Al «Atyraý jylý-elektr ortalyǵy» AQ-nyń sarqyndy sýlaryna arnalǵan Malomokryı arnasynan 93 myńǵa jýyq shabaq súzilip alynǵan.

«Mahambet aýdanyndaǵy Jalǵansaı jáne Saraıshyq aýyldyq okrýgteriniń qyzmetkerleri eriktilermen birge Atyraý-Oral baǵytyndaǵy trassa mańyna jınalǵan jaıylma sýdan 80 myńnan asa balyq shabaǵyn qutqardy. Arnaıy quraldarmen súzilip alynǵan shabaqtar tiri kúıinde Jaıyq ózenine jiberildi. Qazir jaıylmadaǵy sýdy «Sokolok» arnasyna baǵyttaý úshin qosymsha kanal qazylyp jatyr», - dep málim etti Nurlan Jantoqov.

Eske sala ketelik, budan buryn Atyraýdyń mańyndaǵy kanalda balyq ólip jatqanyn jazǵan edik.

Keıin Atyraý mańyndaǵy kanalda balyq otteginiń jetispeýshiliginen qyrylýy múmkin ekeni aıtyldy.

Sondaı-aq, «Teńiz» ken ornynan Qara teńizge munaı jetkizetin qubyr tusynda balyq qyryldy.