Atyraý oblysyndaǵy ınvestıtsııalyq jobalardyń smetalyq quny ósken
Parlament Senatynyń depýtaty Álibek Náýtıevtiń aıtýynsha, 2021-2024 jyldary aralyǵynda Atyraý oblysy boıynsha bıýdjettik baǵdarlamalarynyń ákimshileri bastapqy quny 266,5 mlrd teńgeni quraıtyn 148 ınvestıtsııalyq jobaǵa túzetýge engizilgen.
«Bul jobalardyń smetalyq quny 409,2 mlrd teńgege deıin ósip otyr. Ósim 142,6 mlrd teńgeden asady. Bul smetalyq qunnyń ósimin jergilikti bıýdjet esebinen jabý kerek bolyp otyr. Joba qunynyń bastapqy bekitilgen qunynan 2 nemese odan da kóp ese óskeni kezdesedi. Bıýdjet kodeksiniń 46-babyna sáıkes bıýdjetten nysanaly damý transfertteri esebinen iske asyrylatyn jergilikti bıýdjettik ınvestıtsııalardyń smetalyq qunyn ulǵaıtýǵa baılanysty shyǵystar tıisti jergilikti bıýdjet qarajaty esebinen júzege asyrylatyny kózdelgen. Mundaı jaǵdaıda jergilikti bıýdjetke orasan zor júkteme túsedi», - deıdi Álibek Náýtıev.
Senator Úkimet basshysyna jergilikti bıýdjettiń shekteýli ekenin eskere otyryp, respýblıkalyq bıýdjetten túzetýlerdiń ulǵaıtylǵan somasyn qarjylandyrý múmkindigin qarastyrýdy usynyp otyr.
«Investıtsııalyq jobalardyń smetalyq qunynyń ulǵaıý máselesi tek Atyraý oblysynda ǵana emes, elimizdiń basqa óńirlerinde de sheshilmeı otyr. Osyǵan baılanysty jańa Bıýdjet kodeksiniń jobasyna osy máseleni sheshýge baǵyttalǵan erejelerdi engizý qajet. Eger jobalar respýblıkalyq bıýdjetten beriletin transfertter esebinen qarjylandyrylatyn bolsa, jergilikti bıýdjetten jobalaý-smetalyq qujattamany túzetýge arnalǵan shyǵystardy qarjylandyrý týraly bapty Bıýdjet kodeksinen alyp tastaý kerek», - deıdi Álibek Náýtıev.
Eske sala ketelik, budan buryn Qashaǵan gazyn óńdeıtin zaýyt 2026 jyly iske qosylatynyn habarlaǵan edik.