Atyraý oblysynda zırattaǵy túnek úıi órtenip ketti

<p>ATYRAÝ. KAZINFORM &mdash; Atyraý oblysynda zırattaǵy túnek úıi túgi qalmaı órtenip ketti. Túnek úıi Qyzylqoǵa aýdanynyń ortalyǵy &mdash; Mııaly aýylynan 9 shaqyrym qashyqtyqtaǵy zıratta salynǵan.</p>

Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, órt keshe, 15 aqpanda túngi mezgilde bolǵan. 

«Túngi saǵat 22:25-te Qyzylqoǵa aýdanyndaǵy órt sóndirý bólimine Mııaly aýylynan 9 shaqyrym qashyqtyqta ornalasqan «Saqal ata» zıratyndaǵy úıden tútin shyǵyp jatqany týraly shaqyrtý tústi. Órt sóndirýshiler shaqyrtý ornyna jetken kezde 80 sharshy metrlik túnek úıiniń órtenip jatqany anyqtaldy. Sol kezde túnek úıinde adam bolmaǵan. Jalyn búgin, 16 aqpanda saǵat 00:23-te tolyq sóndirildi», - dep habarlady departamenttiń qoǵammen baılanys toby.

Órtti sóndirýge Atyraý oblystyq tótenshe jaǵdaılar departamentiniń 3 qyzmetkeri men 1 tehnıkasy tartyldy. 

Foto: Atyraý oblystyq TJD

«Oblys turǵyndary men qonaqtaryna órt qaýipsizdigi erejelerin qatań saqtaýdy eskertemiz. Óıtkeni, órttiń saldarynan adam ómirine qaýip tónýi múmkin», - dep málim etti departamenttiń qoǵammen baılanys tobynan. 

Eske sala ketelik, buǵan deıin Atyraýdaǵy órtte kúıip qalǵan úsh jasar bala kóz jumǵanyn https://kaz.inform.kz/news/atiraudagi-ortte-kuyp-kalgan-ush-zhasar-bala-koz-zhumdi-ec8b4a/ habarlaǵan bolatynbyz.