Atyraý oblysynda júrgizýshiniń kóliginen 56 keli bekire tárkilendi

<p>Atyraý oblysynyń 30 jastaǵy júrgizýshiniń kóliginen 56 keli bekire tárkilendi. Ol baǵaly balyqty zańsyz satpaq bolǵan, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Oblystyq polıtsııa departamentiniń baspasóz qyzmetinen málim etkendeı, kúdikti Mahambet aýdanynda ustalǵan.

«Mahambet aýdandyq polıtsııa bóliminiń qyzmetkerleri «Quqyqtyq tártip» respýblıkalyq jedel-profılaktıkalyq sharasy kezinde Lada Kalina avtokóligin toqtatyp, tekserý júrgizdi. Júrgizýshiniń kóliginen bekire tuqymdas balyqtyń 15 danasy tabyldy. Balyqtyń salmaǵy – 56,6 keli. Bekire tuqymdas baǵaly balyq tárkilendi. Jeńil kólik júrgizýshisiniń baǵaly balyqty satpaq bolǵany anyqtaldy», - dep habarlady departamenttiń baspasóz qyzmeti.

Foto: Atyraý oblysy PD

Qazir ustalǵan júrgizýshige qatysty QR Qylmystyq kodeksiniń 339-baby 1-bóligimen sotqa deıingi tergeý amaly bastaldy.

Ózge aqparat QR Qylmystyq-protsestik kodeksiniń 201-babyna sáıkes jarııalanbaıdy.

Eske sala ketelik, budan buryn Atyraýda ınspektorlardan qashqan brakonerler 12 keli bekireni laqtyryp ketkenin habarlaǵan edik.